मागेल त्याला सौर कृषी पंप; ‘महावितरण’चे १०० दिवसांचे उद्दिष्ट ६० दिवसांत पूर्ण

‘मागेल त्याला सौर कृषी पंप’ योजनेत केंद्र सरकारकडून ३० टक्के आणि राज्य सरकारकडून ६० टक्के अनुदान मिळते. त्यामुळे शेतकऱ्यांना केवळ १० टक्के रक्कम भरून सौर ऊर्जानिर्मिती करण्याचे सौर पॅनेल्स, कृषी पंप असा संपूर्ण संच देण्यात येतो. तर, अनुसूचित जाती व अनुसूचित जमातीच्या शेतकऱ्यांसाठी लाभार्थी हिस्सा ५ टक्के असून, त्यांना ९५ टक्के अनुदान दिले जाते.

सौर पंपामुळे हवे तेव्हा सिंचन

‘सौर कृषी पंप बसविल्यावर शेतकऱ्यांना सिंचनासाठी दिवसा वीज उपलब्ध होत असल्याने त्यांची अनेक दशकांची मागणी पूर्ण होते. हे पंप वीजजाळ्यावर अवलंबून नसल्याने शेतकरी दिवसा हव्या त्या वेळेला सिंचन करू शकतो. सौर कृषी पंप बसविण्याच्या बाबतीत राज्याने देशात आघाडी घेतली असून, गेल्या वर्षभरात या मोहिमेला विशेष गती आली आहे. राज्यात २०१५ पासून नऊ वर्षात महावितरणने १,०६,६१६ सौर कृषी पंप विविध योजनांच्या अंतर्गत बसविले होते. मात्र, जानेवारी २०२४ ते फेब्रुवारी २०२५ या काळात दीड लाख पंप बसवण्यात आले आहेत,’ असेही चंद्र यांनी स्पष्ट केले आहे.