पुणे : पुरंदर येथील प्रस्तावित आंतरराष्ट्रीय विमानतळासाठी आत्तापर्यंत १ हजार १८३ हेक्टर जागेची मोजणी पूर्ण झाली आहे. मोजणीप्रक्रिया येत्या सोमवारपर्यंत पूर्ण करण्याचे नियोजन जिल्हा प्रशासनाकडून करण्यात आले आहे.
पुरंदर येथील प्रस्तावित आंतरराष्ट्रीय विमानतळासाठी संमतिपत्रे दिलेल्या शेतकऱ्यांच्या जमिनीची मोजणीप्रक्रिया जिल्हा प्रशासनाकडून सुरू करण्यात आली आहे. मोजणीला प्रारंभ करण्यात आल्यांनतर मुंजवडी, उदाचीवाडी आणि एखतपूर या गावांतील ५० हेक्टर जमिनीची मोजणीप्रक्रिया पूर्ण करण्यात आली होती. त्यामध्ये मुंजवडीतील ७७ हेक्टर, एखतपूरमधील २०१ हेक्टर आणि उदाचीवाडी येथील ४५ हेक्टर अशी एकूण ३२३ हेक्टर जमिनीची मोजणी पूर्ण झाली होती. त्यानंतर आता मोजणीच्या कामाने वेग घेतला असून ११८३ हेक्टर जमिनीची मोजणी पूर्ण झाल्याची माहिती जिल्हाधिकारी जितेंद्र डुडी यांनी दिली.
पुरंदर तालुक्यातील सात गावांतील मोजणीसाठी सहा पथके स्थापन करण्यात आली आहेत. महसूल, वन, सार्वजनिक बांधकाम विभाग, कृषी विभाग, महाराष्ट्र जीवन प्राधिकरण, पुरंदर उपसासिंचन योजोतील अधिकाऱ्यांचा या पथकामध्ये समावेश आहे. फळझाडे, शेतविहिरी आणि जलवाहिन्यांचे मूल्यांकन मोजणी प्रक्रियेत करण्यात येत आहे.
दरम्यान, पुरंदर विमानतळासाठी पारगाव, कुंभारवळण, एखतपूर, मुंजवडी, खानवडी, उदाचीवाडी आणि वनपुरी अशा सात गावांमधून जमीन संपादित होणार आहे. विमानतळासाठी एकूण तीन हजार एकर जमीन संपादित करण्यात येणार आहे. संमतिपत्रे देण्याच्या कालावधीत ३ हजार २२० शेतकऱ्यांनी २ हजार ८१० एकर जागेचे संपादन करण्यासंदर्भातील संमतिपत्रे सादर केली आहेत. मोजणीप्रक्रिया पूर्ण झाल्यानंतर दरनिवाडा निश्चित करून शेतकऱ्यांना देण्यात येणारा मोबदला आणि परताव्याबाबत सरकारकडे प्रस्ताव पाठविण्यात येणार आहे. त्यानंतर थेट भूसंपादनाची प्रक्रिया सुरू करण्यात येणार आहे.