पुणे : चार वर्षांपूर्वी महापालिकेच्या मिळकतकर अभय योजनेचा फायदा घेतलेल्यांपैकी निम्मे मालमत्ताधारक पुन्हा थकबाकीदार असल्याची माहिती समोर आली आहे. या थकबाकीदारांकडून तातडीने मिळकतकराची रकम वसूल करून त्यांना पुन्हा अभय योजनेचा फायदा दिला जाऊ नये, अशी मागणी केली जात आहे.
मिळकतकराची कोट्यवधी रुपयांची थकबाकी वसूल व्हावी, यासाठी चार वर्षांपूर्वी (२०२०-२१) मध्ये महापालिकेने अभय योजना आणली होती, या योजनेचा फायदा घेऊन एक लाख ४९ हजार ६८३ थकबाकीदारांनी महापालिकेचा कर भरला. या योजनेमुळे महापालिकेने थकबाकीदारांना केलेला दंड आणि व्याजमाफी पोटी महापालिकेचे २१० कोटी रुपयांचे नुकसान झाले. त्यानंतर दुसऱ्या वर्षी २०२१-२२ मध्ये महापालिकेने पुन्हा अभय योजना आणली होती. या योजनेचा फायदा ६६ हजार ४५४ थकबाकीदार मिळकतकरधारकांनी घेऊन थकबाकी भरली. या प्रक्रियेतही महापालिकेचे ६४ कोटी रुपयांचे नुकसान झाले.
या योजनांमुळे दरवर्षी प्रामाणिकपणे वेळेवर कर भरणाऱ्या नागरिकांवर याचा परिणाम होईल. तसेच, यामुळे थकबाकीदार नवीन अभय योजना येईपर्यंत नियमित कर भरणार नाहीत, अशी भीती व्यक्त केली जात होती. ही भीती खरी ठरली असून, ज्या मिळकतदार थकबाकीदारांनी चार वर्षांपूर्वी महापालिकेच्या अभय योजनेचा फायदा घेतला होता. त्यातील निम्मे पुन्हा थकबाकीदार झाले आहेत. सजग नागरिक मंचाचे विवेक वेलणकर यांनी माहितीच्या अधिकारात विचारलेल्या प्रश्नाला उत्तर देताना महापालिकेने ही माहिती दिली आहे.
चार वर्षांपूर्वी २०२०-२१ मध्ये एक लाख ४९ हजार ६८३ थकबाकीदार मालमत्ता धारकांनी अभय योजनेचा फायदा घेतला. त्यापैकी ६३ हजार ५१८ मालमत्ताधारक डिसेंबर २०२४ अखेर पुन्हा थकबाकीदार झाले. तर, २०२१-२२ मध्ये ज्या ६६ हजार ४५४ थकबाकीदार मालमत्ताधारकांनी अभय योजनेचा फायदा घेतला, त्यापैकी ४४ हजार ६८५ मालमत्ताधारक डिसेंबर २०२४ अखेर पुन्हा थकबाकीदार झाले आहेत. अभय योजनेचा फायदा घेतल्यानंतरही लाखापेक्षा अधिक मालमत्ताधारकांनी महापालिकेचा मिळकतकर थकविला आहे. त्यांना यापुढील काळात कोणतीही सवलत न देता महापालिकेने त्यांच्याकडून तातडीने थकबाकीची वसूल करावी तसेच अभय योजनेचा फायदा देखील या थकबाकीदारांना होणार नाही, यासाठी महापालिकेने लक्ष द्यावे, अशी मागणी वेलणकर यांनी महापालिका आयुक्त डॉ. राजेंद्र भोसले यांच्याकडे केली आहे.
© The Indian Express (P) Ltd