पुणे : पुणे महापालिकेत कामावर उशिरा येणाऱ्या कर्मचाऱ्यांना महापालिकेच्या प्रवेशद्वारावर अडवून त्यांची नोंद घेण्यात आली. यामध्ये वर्ग एक ते चारमधील पाचशेहून अधिक जणांचा समावेश असून, या सर्वांना उशिरा आल्याबद्दल कारणे दाखवा नोटीस बजावून खुलासा मागविण्यात आला आहे. यामध्ये विभागप्रमुखांसह चतुर्थ श्रेणी कर्मचाऱ्यांचा समावेश आहे.
महापालिकेच्या आयुक्तपदाची सूत्रे स्वीकारल्यानंतर विभागप्रमुखांच्या बैठकीत आयुक्त नवल किशोर राम यांनी वेळेवर कामावर येण्याची ताकीद दिली होती. वेळेत कामावर येऊन शिस्त पाळणार नाहीत, त्यांच्यावर कारवाईचा इशारा आयुक्तांनी दिला होता. त्यानुसार आता कारवाईस सुरुवात झाली आहे. दोन आठवड्यांपूर्वीदेखील आयुक्तांनी उशिरा येणाऱ्या कर्मचारी, अधिकाऱ्यांना वेळ पाळण्याची तंबी दिली होती.
महापालिकेच्या कर्मचाऱ्यांना सरकारी कर्मचाऱ्यांप्रमाणे पाच दिवसांचा आठवडा लागू केला आहे. त्यासाठी महापालिकेकडून रोजच्या कामाच्या तासांत वाढ करून शनिवारी कर्मचाऱ्यांना सुटी देण्यात आली आहे. मात्र, त्यानंतरही विभागप्रमुख आणि कर्मचारी दिलेल्या वेळेचे पालन करत नसल्याचे दिसून येत होते. त्यामुळे शुक्रवारी कामावर उशिरा आलेल्या सुमारे पाचशे कर्मचाऱ्यांना महापालिका आयुक्तांच्या आदेशाने महापालिकेच्या प्रवेशद्वारावर अडविण्यात आले. त्यांच्या नावांची नोंद घेऊन त्यांना कारणे दाखवा नोटीस बजाविण्यात आली. त्यांमध्ये सहा विभागप्रमुखांचा समावेश आहे.
महापालिकेची कार्यालयीन वेळ सकाळी पावणेदहा वाजता सुरू होते. मात्र, काही अधिकारी-कर्मचारी दहानंतर, तर काही बारा वाजून गेल्यानंतर कार्यालयात येत होते. जे कर्मचारी, अधिकारी उशिरा आले, त्यांच्या वेळेची नोंद घेऊन त्यांना उशिरा आल्याची नोटीस देण्यात आली आहे, असे सामान्य प्रशासन विभागातील अधिकाऱ्यांनी सांगितले.
महापालिकेचे सामान्य प्रशासन विभागाचे उपायुक्त प्रसाद काटकर म्हणाले, महापालिकेने कर्मचारी, अधिकाऱ्यांना कामावर येण्यासाठी वेळ निश्चित केली आहे. त्याचे पालन न करता उशिरा आलेल्यांची नावे नोंदवून कारणे दाखवा नोटीस देण्यात आली आहे. यामध्ये विभागप्रमुखांसह, वरिष्ठ अधिकारी, कर्मचारी यांचा समावेश आहे. आयुक्तांच्या आदेशाने ही कारवाई करण्यात आली आहे.