पिंपरी-चिंचवड शहरातील सांगवी पोलीस ठाण्याच्या हद्दीत सोनसाखळी हिसकावणाऱ्या इराणी टोळीने हैदोस घातला होता. अखेर या टोळीच्या मोरक्याला सांगवी पोलिसांनी बेड्या ठोकल्यात. आरोपीकडून साठ हजारांचा मुद्देमाल पोलिसांनी जप्त केला आहे. सराईत सोनसाखळी चोरटा मुसा अन्नू सय्यद उर्फ इराणी याला पोलिसांनी अटक केली असून इतर तीन आरोपींचा शोध सांगवी पोलीस घेत आहेत.
पोलिसांनी दिलेल्या माहितीनुसार, सांगवी पोलीस ठाण्याच्या हद्दीत पिंपळे गुरव, नवी सांगवी, सांगवी या उच्चभ्रू परिसरामध्ये मॉर्निंग वॉकसाठी घराबाहेर पडलेल्या महिलांच्या गळ्यातील सोनसाखळी हिसकावून इराणी टोळी पसार व्हायची. या टोळीने एकाच दिवशी दोन ठिकाणी सोनसाखळी हिसकावल्याची घटना घडली होती. या घटनेमुळे सांगवी पोलिसांची चांगलीच डोकेदुखी वाढली होती. अखेर यातील मुख्य आरोपी इराणी टोळीचा म्होरक्या मुसा अन्नू सय्यद उर्फ इराणी याला बेड्या ठोकण्यात आल्या आहेत.
आरोपीकडून ६० हजारांचा सोन्याचा मुद्देमाल जप्त करण्यात आला आहे. आरोपी इराणीला अहमदनगर तोफखाना पोलिसांनी अटक केली होती. अहमदनगरच्या सब जेलमधून आरोपीला सांगवी पोलिसांनी ताब्यात घेऊन अधिक तपास सुरू केला आहे. इराणीचे साथीदार अब्बास सल्लू इराणी, कासिम अफसर सय्यद आणि अज्जू प्रशांत काटकर यांचा शोध सांगवी पोलीस घेत आहेत.