पुणे : शहरातील दोन वेगवेगळ्या अपघातांमध्ये महिलेसह दोघांचा मृत्यू झाला. पुणे-सोलापूर महामार्ग येथे पिकअप वाहनाचा टायर फूटून झालेल्या अपघातामध्ये युवकाचा तर संगमवाडी येथे भरघाव डंपरची धडक बसून दुचाकी महिला मृत्यूमुखी पडली.
पुणे- सोलापूर महामार्गावर घुले वस्तीजवळ भरधाव पिकअप वाहनाचा टायर फुटून झालेल्या भीषण अपघातात एकाचा मृत्यू झाला. तर चालक गंभीररित्या जखमी झाला. हा अपघात मंगळवारी पहाटे साडेपाचच्या सुमारास घडला. पिकअप वाहनातून फूल विक्रीसाठी पुण्याकडे येत असताना हा अपघात झाला.
सुनील जमाल दोरगे (वय ३९, रा. यवत. ता. दौड) असे या अपघातामध्ये मृत्यू झालेल्याचे नाव आहे. तर चालक युवराज भिमराव दोरगे (वय ४२) हे जखमी झाले आहेत. या प्रकरणी लोणी काळभोर पोलीस ठाण्यात वाहन चालक युवराज दोरगे यांच्याविरुद्ध गुन्हा नोंदविण्यात आला आहे. याबाबत सुनील यांच्या चुलत भावाने तक्रार दिली आहे.
पोलिसांनी दिलेल्या माहितीनुसार, युवराज आणि सुनील हे यवत येथील दोरगेवाडी येथून पिकअप वाहनामध्ये फुले घेऊन पुण्यातील मार्केट यार्ड येथे विक्रीसाठी येत होते. पहाटेच्या सुमारास ते सोलापूर-पुणे रस्त्यावरून येत असताना घुले वस्ती परिसरात आल्यानंतर भरधाव वेगातील पिकअप वाहनाचा अचानक टायर फुटला आणि भीषण अपघात झाला. टायर फुल्याने वाहन दोन ते तीन वेळा पलटी झाले. यामध्ये शेजारी बसलेल्या सुनील यांचा गंभीर जखमी होऊन मृत्यू झाला.
भरधाव डंपरच्या धडकेत दुचाकीस्वार महिलेचा मृत्यू
संगमवाडी परिसरातील रस्त्यावर ट्रॅव्हल्स पाँईटसमोर एका भरधाव डंपरने दिलेल्या धडकेत दुचाकीस्वार महिलेचा मृत्यू झाला. दोन दिवसांपूर्वी (४ नोव्हेंबर) रात्री साडे नऊच्या सुमारास हा अपघात झाला. ट्रॅव्हल्स कंपन्यांच्या वाहनांमुळे या परिसरात रात्री प्रचंड गर्दी असते. तरीही अपघात झाल्यानंतर डंपरचालक येथून पसार झाला.
कविता पिराजी सिताप (वय ३८, रा. साईनाथनगर, गवळीवाडा, खराडी) असे मृत्यूमुखी पडलेल्या महिलेचे नाव आहे. या प्रकरणी डंपर चालक राज अंबा रेड्डी (वय ३१, रा. धायरी) याच्यावर गुन्हा दाखल करून त्याला पोलिसांनी अटक केली. याबाबत कविता यांचा मुलगा बालाजी यांनी फिर्याद दिली आहे.
पोलिसांनी दिलेल्या माहितीनुसार, कविता या खराडी येथील साईनाथनगर परिसरात राहण्यास आहेत. त्या दुचाकीने संगमवाडी येथून येरवड्याच्या दिशेने जात असताना ट्रॅव्हल्स कंपनीच्या कार्यालयासमोर भरधाव डंपरने त्यांच्या दुचाकीला जोराची धडक दिली. या धडकेत कविता या रस्त्यावर कोसळल्याने त्यांना गंभीर मार लागला. या अपघातातच त्यांचा मृत्यू झाला. दरम्यान, अपघातानंतर पसार झालेल्या डंपर चालक राज रेड्डी याला पोलिसांनी अटक केली.