पिंपरी : फटाका स्टॉलची गुन्हेगारी पद्धतीने जाहिरात करणे एका तरुणाला भोवले. फटाक्यांच्या स्टॉलची प्रसिद्धीसाठी तरुणाने टोळीयुद्धाचा बनावट प्रसंग साकारत गोळीबाराचे थरारक रील तयार केले. ही रील समाजमाध्यमावर प्रसारित झाली. थेरगाव येथे घडलेल्या या प्रकाराची वाकड पोलिसांनी गंभीर दखल घेऊन तरुणाला ताब्यात घेतले. त्यानंतर पुन्हा असे रील बनवणार नाही, असे म्हणत या स्वयंघोष़ित ‘भाई’ने माफी मागितली.
राकेश मराठे असे या रीलबहाद्दर तरुणाचे नाव आहे. राकेशला रिल्स बनवण्याचा छंद आहे. राकेश याने काळेवाडी-थेरगाव रस्त्यावर फटाका स्टॉल टाकला आहे. फटाक्यांच्या स्टॉलची प्रसिद्धी व्हावी, यासाठी तरुणाने टोळीयुद्धाचा बनावट प्रसंग साकारून गोळीबाराचे थरारक रील तयार केले. ‘थेरगावमध्ये खुलेआम घडलेला प्रकार’ अशी ओळ देऊन त्याने रील बनवले.
हातात प्लास्टिकचे पिस्तुल घेऊन चेहऱ्यावर गुंडांच्या थाटात भाव आणि त्यानंतर दुचाकीवरील तरुणावर बनावट गोळीबाराचे दृश्य बनवले आणि शेवटी फटाक्यांच्या स्टॉलचे नाव आणि पत्ता झळकवला. हे रील प्रसारित झाल्यानंतर त्यातील दृश्य हे खरे असल्याचे भासत होते.
या रीलविरोधात तीव्र प्रतिक्रिया उमटल्या. वाकड पोलिसांनी मंगळवारी सकाळीच या बहाद्दराचा शोध घेत त्याला पोलीस ठाण्यात आणले. पोलिसी खाक्या दाखवून त्याला समज दिली. त्यानंतर त्याने झाल्या प्रकाराबाबत माफी मागितली. तसेच, संबंधित रील हटविले. त्याने माफी मागितल्याची चित्रफीत समाजमाध्यमावर प्रसारित करण्यात आली.
फटाक्याच्या स्टॉलची जाहिरात करण्यासाठी संबंधित तरुणाने गुन्हेगारीचे उदात्तीकरण होईल असे रील बनवून समाजमाध्यमावर प्रसारित केले. याबाबत माहिती मिळताच तरुणाला पोलीस ठाण्यात आणले. त्याला समज देण्यात आली आहे. तरुणाने झाल्या प्रकाराबाबत माफी मागून रील हटवल्याचे वाकड पोलीस ठाण्याचे वरिष्ठ पोलीस निरीक्षक शत्रुघ्न माळी यांनी सांगितले.