पुणे : पोलिसांनी दिलेल्या मानसिक आधारामुळे सारसबागेत पाडव्याच्या दिवशी (बुधवारी, २२ ऑक्टोबर) ‘गोवर्धन पहाट दिवाळी’ कार्यक्रम पूर्वनियोजित ठरल्याप्रमाणे होणार असल्याचे संयोजक युवराज शहा यांनी सांगितले. गेल्या २८ वर्षांपासून पुणेकरांसाठी विनामूल्य सादर होणारा दिवाळी पहाट कार्यक्रम नाईलाजास्तव रद्द करावा लागत असल्याचे युवराज शहा आणि जितेंद्र भुरूक यांनी दुपारी प्रसिद्धिपत्रकाद्वारे कळविले होते. मात्र, पोलीस आयुक्त अमितेश कुमार यांच्याशी झालेल्या चर्चेनंतर हा कार्यक्रम ठरल्याप्रमाणे करण्याचा निर्धार शहा यांनी व्यक्त केला.
शनिवारवाड्यामध्ये नमाजपठण केल्याच्या चित्रीकरणानंतर झालेल्या आंदोलनाच्या पार्श्वभूमीवर समाजमाध्यमातून प्रसारित झालेल्या धमकीच्या चित्रीकरणामुळे दर वर्षी पाडव्याच्या दिवशी सारसबाग येथे गेल्या २७ वर्षांपासून होणारा ‘गोवर्धन दिवाळी पहाट’ कार्यक्रम रद्द करण्याचा निर्णय युवराज शहा यांनी सोमवारी घेतला होता. मात्र, पोलीस आयुक्त अमितेश कुमार यांच्या सक्रिय कृतिशीलतेमुळे उपद्रवी समाजकंटकावर कडक कारवाई केली जात आहे. त्यामुळे पुण्यातील सांस्कृतिक जगतात आश्वासक वातावरण निर्माण झाले आहे. हे ध्यानात घेता सारसबागेतील दिवाळी पहाट कार्यक्रम आता पूर्वनियोजित वेळापत्रकानुसार होणार आहे, असे युवराज शहा यांनी जाहीर केले.
दरम्यान, सोमवारी दुपारी हा कार्यक्रम रद्द करण्याच्या निर्णयाप्रत का यावे लागले, या संदर्भात युवराज शहा म्हणाले, ‘सारसबागेतील दिवाळी पहाट कार्यक्रमाला आक्षेप घेणारे एक चित्रीकरण समाजमाध्यमातून प्रसारित झाले. वास्तविक गेल्या २७ वर्षांत कुठलीही अप्रिय घटना घडलेली नाही. उलट तिकीट विक्री करूनही असे कार्यक्रम चालू असताना जनसामान्यांची विनामूल्य दिवाळी पहाट म्हणून सारसबागेतील कार्यक्रमाला उपस्थित राहून हजारो पुणेकर मनमुराद आनंद घेत आले आहेत. पुण्यातील सर्वांत लोकप्रिय आणि भव्य दिवाळी पहाट म्हणून ती प्रस्थापित झाली आहे. या संदर्भात परवानगीचे सर्व सनदशीर सोपस्कार पूर्ण केले असून आणि कार्यक्रमाची जय्यत तयारी केली असताना या कार्यक्रमाशी काडीचाही संबंध नसतानाही तेथे यापूर्वी घडलेल्या घटनांचे निमित्त करून आक्षेप घेतले जात होते. तेथे जर कायदा आणि सुव्यवस्थेचा प्रश्न निर्माण झाला, तर पोलिसांना जबाबदार धरले जाईल, असा जाहीर इशाराही दिला गेला होता. वास्तविक घरची दिवाळी सोडून अहोरात्र मेहनत करत असताना पोलिसांना वेठीस धरणे आम्हाला मान्य नाही. तसेच आमची दिवाळी पहाट विनामूल्य असून, सर्व साधनशूचिता आणि मर्यादा पाळूनच कार्यक्रमांची आखणी केली जात असते. म्हणून कार्यक्रम रद्द करण्याच्या निर्णयाप्रत आलो होतो. मात्र, पोलिसांनी मानसिक आधार दिल्याने आता हा कार्यक्रम पूर्वनियोजित पद्धतीने होईल.’
ताणतणावांनी ग्रासलेल्या जनसामान्यांच्या जीवनात दीपावलीनिमित्त काही आनंदाचे क्षण शिंपडण्याचा उपक्रम आम्ही सलग २८ वर्षे करत आलो आहोत. परंतु, या वर्षी तिथे समाजकंटकामार्फत काही अप्रिय घटना घडवून शांतताभंग होऊ नये आणि आजवरच्या आनंदी सांगीतिक परंपरेला गालबोट लागू नये म्हणून आम्ही माघार घेत होतो. मात्र, पोलीस आयुक्तांशी झालेल्या चर्चेनंतर आता हा कार्यक्रम होणार आहे. – युवराज शहा, संयोजक, गोवर्धन दिवाळी पहाट