पुणे : विरुद्ध दिशेने आलेल्या डंपरच्या धडकेत दुचाकीस्वार तरुणाचा मृत्यू झाल्याची घटना येरवडा भागातील शास्त्रीनगर ते गुंजन चित्रपटगृह रस्त्यावर रविवारी घडली. याप्रकरणी डंपरचालकाविरुद्ध गुन्हा दाखल करण्यात आला.
तन्वीर आलमयार खान (वय ३१, रा. निओ सिटी, बकोरी फाटा, वाघोली, नगर रस्ता) असे मृत्युमुखी पडलेल्या दुचाकीस्वाराचे नाव आहे. याप्रकरणी डंपरचालक अमिल रामसिरीठ सिंह (वय ४६, रा. शास्त्रीनगर, येरवडा) याच्याविरुद्ध गुन्हा दाखल करण्यात आला आहे. याबाबत आत्ता यार खान (वय ३४, रा. निओ सिटी, बकोरी फाटा, वाघोली, नगर रस्ता) यांनी येरवडा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, डंपरचालक सिंह रविवारी (१ जून) येरवड्यातील शास्त्रीनगर चौकातून विरुद्ध दिशेने गुंजन चित्रपटगृहाकडे निघाला होता. सकाळी साडेदहाच्या सुमारास नगर रस्त्याने निघालेल्या दुचाकीस्वार तन्वीर याला विरुद्ध दिशेने आलेल्या डंपरने धडक दिली. अपघातात दुचाकीस्वार तन्वीर याचा जागीच मृत्यू झाला. पोलीस उपनिरीक्षक केकाण तपास करत आहेत.
डंपरचालकांची मुजोरी
भरधाव डंपरचालकांच्या बेदरकारपणामुळे वेगवेगळ्या अपघातांत तिघांचा मृत्यू झाल्याच्या घटना घडल्या आहेत. गेल्या काही दिवसांपासून डंपरचालकांचा बेदरकारपणा आणि मुजोरी यामुळे गंभीर स्वरूपाच्या अपघाताच्या घटनांमध्ये वाढ झाली आहे. बेशिस्त डंपरचालकांविरुद्ध कडक कारवाई करण्याची मागणी करण्यात आली आहे. शहरात अवजड वाहनांना बंदी घालण्यात आली आहे. हा बंदी आदेश डंपरचालक झुगारत असल्याचे दिसून आले आहे.