लोकसत्ता खास प्रतिनिधी

आर्काइव्हमधील सर्व बातम्या मोफत वाचण्यासाठी कृपया रजिस्टर करा

डोंबिवली : डोंबिवली शहराच्या मुख्य वर्दळींच्या रस्त्यावर कार्यक्रमांची प्रसिद्धी करणाऱ्या कमानी, शहरांच्या कोपऱ्यांवर फलक लावून काही संस्थांनी शहराचे विद्रुपीकरण केले आहे. या फलकांवर पालिकेकडून कारवाई होत नसल्याने नागरिक नाराजी व्यक्त करत आहेत.

डोंबिवली शहरातील फडके रस्ता, बाजीप्रभू चौक, इंदिरा चौक, मानपाडा रस्ता हे वर्दळीचे भाग आहेत. त्यामुळे याठिकाणी विविध संस्था, राजकीय मंडळींचे फलक सातत्याने लावण्यात येऊन शहराचे विद्रुपीकरण केले जाते. स्कायवॉकच्या कमानीला सतत फलक लोंबकळत असतात. यामधील अनेक फलकांचे जाहिरात शुल्क पालिकेकडे संबंधितांकडून भरणा केले जात नसल्याच्या तक्रारी आहेत. काही फलक हे राजकीय आहेत. त्यांच्यावर कारवाई केली तर स्थानिक पदाधिकारी फलक काढणाऱ्या पालिका कर्मचाऱ्याला फैलावर घेतो. या अनुभवामुळे पालिका कर्मचारी या फलकांकडे पाहण्या व्यतिरिक्त भूमिका घेत नसल्याचे समजते.

आणखी वाचा-ठाण्यात ‘ग्रँड सेंट्रल पार्क’ ची उभारणी; काश्मीरच्या मुघल गार्डनसह चिनी, मोरोक्कन, जपानी संकल्पनेवर उद्याने

शहर स्वच्छ, सुंदर दिसण्यासाठी पालिका प्रशासन प्रयत्नशील आहे. दुसरीकडे शहरात फलकबाजी करणाऱ्या मंडळींची संख्या मोठ्या संख्येने वाढली आहे. डोंबिवली पश्चिमेत दिनदयाळ चौक, फुले चौक, जुने विष्णुनगर पोलीस ठाणे, कोपर पूल भागात सतत फलक लावून काही संस्था, राजकीय मंडळी शहराचे विद्रुपीकरण करत आहेत.

शहराचे विद्रुपीकरण करणार नाही, अशी हमी विविध राजकीय पक्षांनी उच्च न्यायालयात देऊनही त्यांचे कार्यकर्ते स्थानिक पातळीवर डोंबिवलीत फलकबाजी करून विद्रुपीकरण करत आहेत. शहर विद्रुप करणाऱ्यांवर कठोर कारवाईसाठी आयुक्त डॉ. इंदुराणी जाखड यांनी पुढाकार घेण्याची मागणी नागरिक करत आहेत.

आणखी वाचा-बंदुकीचे सर्वाधिक परवाने ठाणे आणि कल्याण, डोंबिवलीत; बंदूक स्वसंरक्षणासाठी की खोट्या प्रतिष्ठेसाठी ?

फेरीवाले कचरा

डोंबिवली पूर्व रेल्वे स्थानक भागात फेरीवाले रात्री उशिरापर्यंत व्यवसाय करतात. टाकाऊ कचरा रस्त्यावर फेकून निघून जातात. यामुळे पहाटे रेल्वे स्थानक भागातून जाणाऱ्या प्रवाशांना कचरा तुडवत रेल्वे स्थानकात, किंवा या भागातून येजा करावी लागते. रेल्वे स्थानक भागात कचरा करणाऱ्या फेरीवाल्यांवर कारवाई करण्यासाठी साहाय्यक आयुक्तांनी पुढाकार घेण्याची मागणी नागरिक करत आहेत.

Thane News (ठाणे न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Disfigurement of dombivli town due to hoarding garbage from hawkers in railway station area mrj