भविष्यातील पाणथळ संवर्धनासाठी राष्ट्रीय परिषद; मुंबई विद्यापीठ तसेच महाविद्यालयीन विद्यार्थ्यांचा सहभाग

देशभरातील २.३१ लाख पाणथळ जागा संरक्षित करण्याचे आदेश सर्वोच्च न्यायालयाच्यावतीने सर्व राज्य प्राधिकरणाला देण्यात आले आहेत. या पार्श्वभूमीवर राज्यातील ५६४ पाणथळींकडे सर्वांचे लक्ष लागून राहिले आहे. याच पार्श्वभूमीवर पाणथळ संरक्षणासाठी स्वच्छ खाडी अभियान अंतर्गत पर्यावरण दक्षता मंडळ, एनव्हायरो विजिल, महाराष्ट्र कांदळवन आणि सागरी जैवविविधता संवर्धन प्रतिष्ठान, मुंबई विद्यापीठ आणि असोसिएशन ऑफ टीचर्स इन बायोलॉजिकल सायन्सेस यांच्या संयुक्त विद्यमाने राष्ट्रीय परिषदेचे आयोजव करण्यात आले आहे. पाणथळभूमी दिनानिमित्त दरवर्षी ही परिषद होत असते. यंदाची परिषद ‘भविष्यासाठी पाणथळींचे संरक्षण’ या विषयावर असणार आहे. यावेळी वेटलैड्स इंटरनॅशनल साउथ एशियाचे डायरेक्टर डाॅ. रितेश कुमार यांचे व्याख्यान असणार आहे. तसेच यावेळी महाराष्ट्र कांदळवन आणि सागरी जैवविविधता संवर्धन प्रतिष्ठानच्यावतीने खारफुटी परिसंस्था आणि जैवविविधता संवर्धन या विषयावर मार्गदर्शन केले जाणार आहे. तसेच देशातील विविध पाणथळभूमीवर चालु असलेले शोधकार्य, अभियान, चळवळी आणि संवर्धनात्मक प्रयत्न याविषयी चर्चा होणार आहे. ही परिषद शनिवार, १ फेब्रुवारी रोजी मुंबई विद्यापीठाच्या कलिना कॅम्पसमध्ये असणार आहे.

हेही वाचा >>>मुंबई नाशिक महामार्गाच्या रुंदीकरणाचे ६४ टक्के काम पूर्ण; मे अखेरीस पूर्ण करण्याचे एमएसआरडीसीपुढे आव्हान

पाणथळ संवर्धनासाठी पथनाट्य

ठाणे जिल्ह्यातील एकूण १४ महाविद्यालयातील राष्ट्रीय सेवा योजनेतील विद्यार्थ्यांनी पथनाट्य सादर केले होते. पाणथळ संवर्धन आणि पाणथळींवर अवलंबून असणारी जीवसृष्टी या विषयावर हे पथनाट्य सादक झाले होते. यातील एक पथनाट्याचे सादरीकरण परिषदेच्यावेळी करण्यात येणार आहे.

महाविद्यालयीन विद्यार्थ्यांना पाणथळभूमी संवर्धनामध्ये सहभागी करून घेण्याच्या उद्देशाने विविध स्पर्धा आयोजित करण्यात आले होते. यामध्ये पाणथळभूमी छायाचित्रण स्पर्धा, लघुचित्रफित स्पर्धा, फलक तयार करणे स्पर्धा घेण्यात आल्या. यातील अनेक फलक आणि शोधनिबंधांचे परिषदेच्यावेळी सादरीकरण केले जाणार आहे.