कल्याण-डोंबिवलीत मनसेला आणखी एक मोठा झटका बसला आहे. कल्याण-डोंबिवली महापालिकेतील माजी विरोधी पक्ष नेते आणि गटनेते मंदार हळबे यांनी आज प्रदेशाध्यक्ष चंद्रकांत पाटील यांच्या उपस्थितीत भाजपामध्ये प्रवेश केला. कालच डोंबिवलीतील महाराष्ट्र नवनिर्माण सेनेचे माजी शहराध्यक्ष तसेच प्रदेश उपाध्यक्ष राजेश कदम यांनी कार्यकर्त्यांसह सोमवारी सायंकाळी मुख्यमंत्री उद्धव ठाकरे, पालकमंत्री एकनाथ शिंदे यांच्या उपस्थितीत मुंबईत शिवसेनेत प्रवेश केल्याने मनसेला डोंबिवलीत धक्का बसला होता.
राजेश कदम, मंदार हळबे या सारख्या नेत्यांनी पक्षाला सोडचिठ्ठी देणे, हा मनसेसाठी एक मोठा धक्का आहे. कारण कल्याण-डोंबिवलीत मनसेचा विस्तार आणि जनाधार वाढवण्यात या दोन्ही नेत्यांची महत्त्वाची भूमिका होती. राज ठाकरे यांच्या विश्वासातील नेते म्हणूनही ते ओळखले जायचे.
आणखी वाचा- मनसेला बालेकिल्ल्यातच खिंडार! डोंबिवली शहराध्यक्षासह पदाधिकारी शिवसेनेत
त्यांनी राजीनामे का दिले ? ते अजून स्पष्ट होऊ शकलेले नाही. पण कल्याण-डोंबिवलीत मनेसतंर्गत सर्वकाही आलबेल नसल्याचे यावरुन स्पष्ट होते. राजेश कदम हे तर स्थापनेपासून मनसे सोबत होते. मंदार हळबे यांनी २०१९ मध्ये मनसेच्या तिकीटावर डोंबिवलीतून विधानसभेची निवडणूक लढवली होती. भाजपाच्या रवींद्र चव्हाण यांच्याकडून त्यांचा पराभव झाला होता.