ठाणे- पर्यावरणपूरक गणेशोत्सव साजरा व्हावा यासाठी सर्वच स्तरातून प्रयत्न केले जात आहेत. ठाणे महापालिकेच्या वतीने देखील गेले एक ते दोन वर्षांपासून पर्यावरणपूरक गणेशमूर्तीला प्राधान्य देण्याचे आवाहन नागरिकांना करण्यात येत आहे. यासाठी यंदाच्या वर्षी महापालिकेने ‘माझे घर, माझा गणपती’ या संकल्पना आमलात आणली या संकल्पने अंतर्गत नागरिकांना पर्यावरणपूरक गणेशमुर्ती घडविण्यासाठी कार्यशाळेचे आयोजन केले जात आहे. शहरातील विविध ठिकाणी गेले महिन्याभरापासून ही कार्यशाळा राबविली जात आहे.
‘माझे घर, माझा गणपती’ या संकल्पनेनुसार महापालिकेद्वारे शहरात विविध ठिकाणी शाडू मातीपासून मूर्ती घडविण्याच्या कार्यशाळा आयोजित केल्या जात आहेत. त्यासाठी पर्यावरण दक्षता मंडळ आणि इतर सामाजिक संस्थांचे सहकार्य घेण्यात आले आहे. या कार्यशाळा सर्व नागरिकांसाठी विनामूल्य खुल्या असून त्यासाठी नोंदणी करणे आवश्यक आहे. १४ जूनपासून दादोजी कोंडदेव स्टेडियम येथील पर्यावरण दक्षता मंडळाच्या ग्रीन शॉपी कार्यालयात आतापर्यंत १०० हून अधिक नागरीकांनी शाडू मातीपासून गणपती मूर्ती घडविल्या आहेत. अधिकाधिक नागरिकांना सहभागी होता यावे यासाठी कार्यशाळांची संख्या आणि ठिकाणे वाढविण्यात येत असल्याची माहिती मुख्य पर्यावरण अधिकारी मनीषा प्रधान यांनी दिली. या कार्यशाळांच्या नोंदणीसाठी पर्यावरण दक्षता मंडळ यांच्या प्रतिनिधींशी ९९२०७७२८६९ या क्रमांकावर संपर्क साधावा, असे आवाहन ठाणे महापालिकेच्या वतीने करण्यात आले आहे.
याठिकाणी होणार कार्यशाळा
१. दादोजी कोंडदेव स्टेडियम, गाळा क्र. १५ येथे १७ ऑगस्टपर्यंत दररोज कार्यशाळा होत आहे.
२. उपवन तलाव ॲम्फी थिएटर येथे १७ ऑगस्टपर्यंत केवळ शनिवार आणि रविवारी कार्यशाळा होईल.
३. महामानव शिवशाहूफुलेआंबेडकर स्मृती सभागृह, बेथनी हॉस्पिटलजवळ, पोखरण येथे ०२ आणि ०३ ऑगस्ट रोजी कार्यशाळा होणार आहे.
विद्यार्थ्यांनाही गणपती मूर्ती घडविण्याचे प्रात्यक्षिक
पर्यावरण शाळा या उपक्रमाअंतर्गत पर्यावरण दक्षता मंडळाच्या सहाय्याने ठाणे महानगरपालिकेद्वारे अद्यापपर्यंत ठामपा क्षेत्रातील विविध शाळांमध्ये ३०००हून अधिक शालेय विद्यार्थ्यांना पर्यावरणपूरक गणपती घडविण्याचे प्रात्यक्षिक करून दाखविण्यात आले आहे. पर्यावरणपूरक उत्सव साजरे करण्याबाबत जनजागृतीही करण्यात आली आहे. महापालिका क्षेत्रातील ठाणे शहर, डायघर, खर्डी, दिवा, मुंब्रा, बाळकुम, मानपाडा, ओवळा येथील शाळांनी या उपक्रमांत उत्स्फूर्त सहभाग नोंदवला.
महापालिकेकडून शाडू मातीच्या मूर्तींसाठी प्रोत्साहन
पर्यावरणपूक गणेशोत्सवासाठी ठाणे महापालिकेने याही वर्षी ०४ मूर्तीकारांना नि:शुल्क जागा उपलब्ध करून दिली आहे. तर, महापालिकेकडे आलेल्या अर्जाप्रमाणे १७ मूर्तीकारांना विनामूल्य २५ टन शाडू माती उपलब्ध करून दिली असल्याची माहितीही मनीषा प्रधान यांनी दिली.