ठाणे : शालेय क्रिकेटमध्ये मानाची स्पर्धा असलेल्या कौन्सिल फॉर द इंडियन स्कूल सर्टिफिकेट एक्झामिनेशन् (CISCE ) स्पर्धेसाठी ठाण्यातील वसंत विहार शाळेच्या आणि भांडुपच्या पवार पब्लिक स्कूलच्या १४ वर्षाखालील मुलींचा समावेश असलेल्या झोन सी संघाने झोन इ संघाचा अंतिम सामन्यात दारुण पराभव केला. यामुळे वसंत विहार शाळा आणि पवार पब्लिक स्कूलवर अभिनंदनाचा वर्षाव होत आहे. ही १४ वर्षाखालील मुलींच्या संपूर्ण टीम आता राष्ट्रीय पातळीवरील स्पर्धेसाठी निवड झाली असून पुढील आठवड्यात उत्तर प्रदेशातील गोरखपूर येथे खेळायला जाणार आहे.
शालेय क्रिकेटमध्ये कौन्सिल फॉर द इंडियन स्कूल सर्टिफिकेट एक्झामिनेशन् (CISCE ) ही मानाची स्पर्धा म्हणून ओळखी जाते. या स्पर्धेत झोन सी रिजनमधून ठाण्यातील वसंत विहार शाळेच्या ११ तर भांडुप येथील पवार पब्लिक स्कूलच्या ६ मुलींची निवड झाली होती. मंगळवारी ९ सप्टेंबर रोजी पुण्यातील कॅम्प परिसरात बिशप हायस्कूल येथे या राज्य पातळीवरील स्पर्धेचे आयोजन करण्यात आले होते. या स्पर्धेत झोन सी संघाने साखळी सामन्यात विजय मिळवून अंतिम सामना गाठला. झोन सी संघाविरुद्ध झोन इ संघाचा अंतिम सामना झाला. या सामन्यात झोन सी संघाने प्रथम फलंदाजी करत १२ षटकात २ विकेटच्या बदल्यात ११० धावा केल्या. या ११० धावांचा पाठलाग करताना झोन इ संघ अक्षरशः ढेपाळला. अवघ्या साडेसहा षटकात अख्खा संघ गारद झाला. त्यांनी कशाबशा अवघ्या १९ धावा केल्या.
शाळांवर अभिनंदनाचा वर्षाव
झोन सी संघाच्या क्षेत्ररक्षणाच्या जोरावर यष्टिरक्षक काव्या पष्टे हिने चमकदार कामगिरी करत तब्बल सहा खेळाडूंना यष्टीचीत केले. ती या सामन्याची प्लेअर ऑफ मॅच ठरली. तर कर्णधार दिलीशा आंगचेकर हिने सर्वाधिक २० धावा केल्या तर गोलंदाज गौतमी मोरे हिने अवघ्या ९ चेंडूत ५ धावा देत ३ विकेट मिळवून बेस्ट बॉलर ठरली. या संघाचे मुख्य प्रशिक्षक किरण साळगावकर यांच्या मार्गदर्शनाखाली कोच प्रशांत मोरे आणि स्वाती पाटील यांनी केलेल्या नियोजनामुळे हा विजय मिळवता आल्याचे सांगितले जात आहे. राज्यपातळीवरील सीआयएससीई सारखी मानाची क्रिकेट स्पर्धा जिंकल्याने वसंत विहार शाळा आणि पवार पब्लिक स्कूलवर अभिनंदनाचा वर्षाव होत आहे.
राष्ट्रीय पातळवरील स्पर्धेसाठी निवड
एकीकडे १४ वर्षाखालील मुलींच्या संघाने सीआयएससीई रिजनल क्रिकेट ही मानाची स्पर्धा जिंकल्याचा आनंद व्यक्त होत असताना दुसरीकडे या संपूर्ण संघाची आता राष्ट्रीय पातळवरील स्पर्धेसाठी निवड झाली आहे. येत्या १४ ते १६ सप्टेंबर रोजी हे सामने उत्तर प्रदेशातील गोरखपूर येथे होणार आहेत. या स्पर्धेत या मुली महाराष्ट्राच्या १४ वर्षाखालील संघाचे नेतृत्व करणार आहेत. त्यामुळे वसंत विहार हायस्कूल आणि मुख्य प्रशिक्षक किरण साळगावकर यांच्यावर शुभेच्छांचा वर्षाव होत आहे.