Bus Driver Heart Attack Video: बंगळुरूच्या चिन्नास्वामी स्टेडियमजवळ एका भयानक अपघाताने सगळ्यांचाच थरकाप उडाला आहे. एका बसचालकाला बस चालवताना अचानक हृदयविकाराचा झटका आला आणि त्याचे बसवरचे नियंत्रण सुटले. त्याचा थरारक अनुभव बसमध्ये बसवलेल्या सीसीटीव्ही कॅमेऱ्यात कैद झाला आहे, जो आता सोशल मीडियावर जोरदार व्हायरल होत आहे.
मिळालेल्या माहितीनुसार, बंगळुरू Metropolitan Transport Corporation (BMTC) च्या एम चिन्नास्वामी स्टेडियमजवळ एका बसचालकाने त्याला अचानक हृदयविकाराचा झटका आल्याने बसवरील नियंत्रण गमावले. त्याला हृदयविकाराचा झटका आल्यानंतरही तो त्या स्थितीमध्येच बसवरील नियंत्रण गमावू नये म्हणून प्रयत्न करीत होता. परंतु, त्या अत्यवस्थ स्थितीमध्येच चुकीने त्याच्याकडून अ‍ॅक्सिलरेटर दाबले गेले. त्यामुळे बस वेगाने पुढे सरकली आणि त्या बसने तीन ऑटोरिक्षा, तीन कार आणि काही बाईकसह एकूण नऊ वाहनांना धडक दिली. हा थरारक प्रसंग सीसीटीव्ही कॅमेऱ्यात कैद झाला आणि सोशल मीडियावर व्हायरल झालेला तो प्रसंग पाहून लोक भयभीत झाले आहेत.
व्हिडीओतले थरकाप करणारे क्षण
व्हिडीओ सुरू होतो तेव्हा बसचालक बसमधील त्याच्या सीटवर बसलेला दिसतो. काही क्षणांनंतर त्याला अचानक हृदयविकाराचा झटका येतोआणि त्या स्थितीत चुकून त्याच्याकडून अ‍ॅक्सिलरेटर दाबल्यामुळे बस पुढे सरकते. बस प्रथम एका ऑटोरिक्षा व कारला धडक देते आणि नंतर रस्त्यावरील इतर वाहनांना क्रमाने धडक देत पुढे पुढे सरकते. बसमधील वाहक तातडीने हालचाल करून बसवर नियंत्रण मिळवण्याचा कसोशीने प्रयत्न करतो. त्याला वेळेत नियंत्रण मिळविणे शक्य होत नाही; पण व्हिडीओच्या शेवटी तो ब्रेक लावण्यात यशस्वी होतो. परंतु बसचालक त्या प्रसंगी हृदयविकाराचा झटका आल्याच्या स्थितीतच हालचाल करीत असतो.
सुदैवाने सर्व जण सुरक्षित
The Hindu च्या रिपोर्टनुसार, बसचालकाला तातडीने जवळच्या रुग्णालयात नेण्यात आले आणि आता त्याची तब्येत स्थिर आहे. BMTC अधिकारी म्हणाले, “सुदैवाने बसमधील कोणालाही इजा झाली नाही. ड्रायव्हरला तातडीने रुग्णालयामध्ये हलवण्यात आले असून, तो आता सुरक्षित आहे.” अधिकाऱ्यांनी आणखी सांगितले, “या घटनेत कुणालाही कोणतीही हानी झालेली नाही आणि सर्व जण सुरक्षित आहेत.”
सुरळीत वाहतुकीसाठी पोलिसांची तत्काळ कार्यवाही
रिपोर्टनुसार, वाहतूक पोलिसांनी तातडीने रस्त्यावर असलेली वाहने काढून वाहतुकीसाठी मार्ग मोकळा केला, जेणेकरून रस्त्यावर कोणतीही वाहतूक कोंडी होणार नाही.
सावधानतेची आठवण
हा थरकाप निर्माण करणारा प्रसंग नकळत लोकांना जागरूकतेसाठी सतर्कतेचा इशारा देतो. अचानक उद्भवलेल्या आपत्कालीन संकटाचा परिणाम किती भयानक होऊ शकतो ते या दुर्घटनेतून स्पष्ट होते. परंतु, बसचालक हृदयविकाराचा झटका आलेला असतानाही बस सावरण्याचा प्रयत्न करीत होता ही लक्षात घेण्यासारखी विशेष बाब म्हणावी लागेल.
थोडक्यात:
बसचालकाला अचानक हृदयविकाराचा झटका, बसने नऊ वाहनांना धडक दिली; पण सुदैवाने कोणालाही इजा झाली नाही. सोशल मीडियावरील व्हिडीओ पाहून लोक भयभीत झाले आहेत. सुरक्षा आणि सावधगिरी बाळगण्याची आठवण करून देणारी ही घटना आहे.