इतर राष्ट्रप्रमुख फोटोसाठी उभे असताना जो बायडेन मात्र भलतीकडेच निघाले; जॉर्जिया मेलोनींनी लक्षात आणून दिल्यावर ऐटीत काढला फोटो!

नेमकं घडलं काय?

जो बायडेन जी-७ परिषदेसाठी इटलीमध्ये दाखल झाले आहेत. या परिषदेच्या निमित्ताने गुरुवारी अर्थात १३ जून रोजी इतर राष्ट्रप्रमुखांसंह परिषदेच्या ठिकाणी बाहेर मोकळ्या जागेत फोटोसेशन चालू होतं. यावेळी इतर सर्व राष्ट्रप्रमुख फोटोसाठी एकत्र उभे असताना नेमके त्याचवेळी जो बायडेन मात्र भलतीकडेच पाहात होते. एवढंच नाही तर ते उभ्या असलेल्या जागेवरून डावीकडे वळून काही अंतर चालतही गेले. नंतर त्या बाजूला तोंड करून ते उभे राहिले.

जो बायडेन तिकडे तोंड करून उभे असताना इकडे इतर राष्ट्रप्रमुख त्यांच्याकडे आश्चर्यचकित होऊन पाहात होते. त्यात यजमान इटलीच्या पंतप्रधान जॉर्जिया मेलोनी, ब्रिटनचे पंतप्रधान ऋषी सुनक, कॅनडाचे पंतप्रधान जस्टिन ट्रुडो, फ्रान्सचे राष्ट्राध्यक्ष इमॅन्युएल मॅक्रॉन, जर्मन चॅन्सेलर ओलफ शोल्झ, युरोपियन युनियनचे अध्यक्ष उर्सुला वोन डेर लेयेन अशा दिग्गज नेत्यांचा समावेश होता!

शेवटी जॉर्जिया यांनीच घेतला पुढाकार!

दरम्यान, फोटोसेशन व व्हिडीओ शूटकडे जो बायडेन यांचं लक्षच नसल्याचं पाहून शेवटी यजमान जॉर्जिया मेलोनी यांनीच पुढे जाऊन जो बायडेन यांना फोटोसेशनची जाणीव करून दिली. त्यानंतरही बायडेन काही पावलंच पुढे सरकले. शेवटी बाजूला उभे असलेले इतर नेते त्यांच्याकडे चालत गेले व त्यांच्या अवती-भवती फोटोसाठी उभे राहिले.

विश्लेषण : अमेरिकेच्या ‘फर्स्ट सन’ला तुरुंगात जावे लागणार?

ऐटीत घातला काळा चष्मा आणि फोटोसेशन संपन्न!

एवढं सगळं झाल्यानंतर शेवटी जो बायडेन यांनी हातातला काळा गॉगल ऐटीत डोळ्यांवर चढवला. सगळे नेते त्यांच्या आजूबाजूला उभे राहिले आणि पुढचं फोटोसेशन पार पडलं. या प्रसंगाचा व्हिडीओ सध्या सोशल मीडियावर तुफान व्हायरल होत आहे. यावर जशा मिश्किल प्रतिक्रिया येत आहेत, तशाच टीकात्मक पोस्टही दिसत आहेत.

“हे कॅमेऱ्यात कैद झालं आहे. तुम्ही कल्पना करू शकता का की या व्यक्तीने जागतिक नेत्यांसमोर आणखी काय काय केलं असेल? हे फारच लाजिरवाणं आहे”, अशी पोस्ट एका अमेरिकन नागरिकानं केली आहे.

तर एका अमेरिकन महिला लेखिकेने “हे ईश्वरा, अमेरिकेला मदत कर. आम्ही अवघड परिस्थितीत आहोत. अजून किती काळ हे या व्यक्तीला आम्हाला खजील करू देणार आहेत?” असा प्रश्न केला आहे.

अशाच प्रकारचे जो बायडेन यांचे आणखीही काही व्हिडीओ आता सोशल मीडियावर व्हायरल होऊ लागले आहेत. त्यामुळे त्यांच्या इटली दौऱ्यातील महत्त्वाच्या विधानांबरोबरच त्यांच्याबाबतीत घडलेले हे प्रसंगही चर्चेचा विषय ठरले आहेत.