फोटोचं उत्तर फोटोने! अमोल मिटकरींचं मनसेला ‘हा’ फोटो ट्वीट करत प्रत्युत्तर! बृजभूषण सिंहांसोबत पवारांचे फोटो झाले होते व्हायरल!

अमोल मिटकरी ट्वीटमध्ये म्हणतात, “…हिंदीत भाषांतर जाणीवपूर्वक टाळले आहे!”

amol mitkari on raj thackeray sharad pawar photo
अमोल मिटकरींचा मनसेवर निशाणा!

मंगळवारी सकाळपासून राज्यातील मनसे आणि राष्ट्रवादी काँग्रेस या पक्षांमध्ये वेगळंच ‘फोटोवॉर’ पाहायला मिळू लागलं आहे. मनसे अध्यक्ष राज ठाकरे यांचे सचिव सचिन मोरे यांनी सकाळी फेसबुकवर बृजभूषण सिंह यांच्यासोबत शरद पवार आणि सुप्रिया सुळे यांचे काही फोटो शेअर केले होते. या फोटोंवरून बराच राजकीय वाद सुरू झाला असून आता त्यावर राष्ट्रवादी काँग्रेसचे नेते अमोल मिटकरी यांनी दुसरा एक फोटो ट्वीट करत प्रत्युत्तर दिलं आहे. विशेष म्हणजे, सचिन मोरे यांनी हिंदीतून दिलेल्या फोटो कॅप्शनचं मराठी भाषांतर करून त्यांनी या फोटोला कॅप्शन दिली आहे. त्यामुळे या फोटोंवरून दोन्ही पक्षांमध्ये चांगलाच कलगीतुरा रंगू लागला आहे.

मनसेकडून शरद पवार आणि बृजभूषण सिंह यांचे दोन फोटो शेअर करण्यात आले आहेत. या फोटोत बृजभूषण सिंह यांच्यासोबत शरद पवार आणि सुप्रिया सुळे दिसत आहेत. हे फोटो नेमके कधीचे आहेत याचा उल्लेख यामध्ये केलेला नाही. मात्र मागे असलेल्या बॅनरवरुन हा कुस्तीचा कार्यक्रम असून मावळमध्ये झाल्याचं दिसत आहे. राज ठाकरेंचे सचिव सचिन मोरे यांनी फेसबुकला हे फोटो शेअर केले आहेत. हे फोटो शेअर करताना त्यांनी “कुछ फोटो अच्छे भी होते है.. और सच्चे भी होते है” असं म्हटलं आहे.

हे फोटो व्हायरल होऊ लागल्यानंतर त्यावरून शरद पवारांनीच बृजभूषण सिंह यांना राज ठाकरेंच्या विरोधात रसद पुरवल्याचा आरोप मनसेकडून करण्यात येत आहे. तर दुसरीकडे खुद्द बृजभूषण सिंह यांनी राज ठाकरेंना विरोध करणं हे आपण पक्षाचंच काम करत असल्याचं स्पष्ट केलं आहे. एकीकडे हे राजकारण आणि दावे-प्रतिदावे रंगत असताना आता राष्ट्रवादी काँग्रेसकडून अमोल मिटकरींनी मनसेला दुसरा एक फोटो ट्वीट करून प्रत्युत्तर दिलं आहे.

काय आहे मिटकरींच्या ट्वीटमध्ये?

अमोल मिटकरींनी आपल्या ट्वीटमध्ये मनसेला खोचक टोला लगावणारा संदेश लिहिला आहे. यात सचिन मोरे यांच्या पोस्टमधील संदेशाचं मराठी भाषांतर देखील त्यांनी लिहिलं आहे. “आधारवड”. पवार साहेब! (काही फोटो चांगलेही असतात आणि खरेही! हिंदीत भाषांतर जाणीवपूर्वक टाळले आहे)”, असा संदेश ट्वीटसोबत मिटकरींनी लिहिला आहे.

“राज ठाकरेंनी शरद पवारांकडून…”, ‘ते’ फोटो व्हायरल झाल्यानंतर भाजपा खासदार बृजभूषण सिंह यांचा खुलासा!

काय आहे फोटोमध्ये?

अमोल मिटकरींनी आपल्या ट्वीटसोबत शेअर केलेल्या फोटोमध्ये मनसे अध्यक्ष राज ठाकरे आणि राष्ट्रवादी काँग्रेसचे अध्यक्ष शरद पवार दिसत आहेत. या फोटोमध्ये राज ठाकरे शरद पवारांना हातात हात देत एका कार्यक्रमातल्या स्टेजवर चढण्यासाठी मदत करत असल्याचं दिसून येत आहे. हा फोटो नेमका कधीचा आहे, हे मिटकरींनी ट्वीटमध्ये म्हटलेलं नाही.

अमोल मिटकरी आणि मनसे यांच्यात गेल्या काही दिवसांपासून राजकीय कलगीतुरा रंगताना पाहायला मिळत आहे. आता या फोटोंच्या राजकारणामुळे या कलगीतुऱ्याला तडका मिळाल्याचं दिसून येत आहे.

मराठीतील सर्व महाराष्ट्र ( Maharashtra ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Amol mitkari tweet on sharad pawar raj thackeray photo brij bhushan singh pmw

Next Story
संभाजीराजेंनी ऑफर नाकारल्याच्या चर्चेनंतर शिवसेनेकडून राज्यसभेसाठी कोल्हापूरसह राज्यातील ‘या’ ४ नेत्यांची चर्चा
ताज्या बातम्या
फोटो गॅलरी