Devendra Fadnavis on Sanjay Gaikwad: मुंबईतल्या आकाशवाणी आमदार निवासातील कॅन्टिनमधल्या एका कर्मचाऱ्याला मारहाण करतानाचा आमदार संजय गायकवाड यांचा व्हिडीओ व्हायरल झाला होता. हे चुकीचं असल्याचं मुख्यमंत्र्यांनी नमूद केल्यानंतर आणि गायकवाडांना समज दिल्याचं उपमुख्यमंत्री एकनाथ शिंदेंनी स्पष्ट केल्यानंतरही गायकवाड आपल्या भूमिकेवर ठाम असल्याचं दिसून आलं. यानंतर आता खुद्द मुख्यमंत्री देवेंद्र फडणवीस यांनी एकनाथ शिंदे गटाचे आमदार संजय गायकवाड यांची पोलिसांकडून चौकशी केली जाईल, असं स्पष्ट केलं आहे.
विधिमंडळात यासंदर्भात विचारणा केली असता संजय गायकवाड यांच्याविरोधात कोणतीही तक्रार दाखल नसल्यामुळे त्यांची चौकशी करता येणार नाही, अशी भूमिका गृहराज्यमंत्र्यांनी मांडल्याबाबत माध्यम प्रतिनिधींनी देवेंद्र फडणवीसांना विचारणा केली. यावर उत्तर देताना देवेंद्र फडणवीसांनी वरील माहिती दिली.
संजय गायकवाडांबाबत काय म्हणाले देवेंद्र फडणवीस?
देवेंद्र फडणवीस यांनी विधानभवनात माध्यम प्रतिनिधींच्या प्रश्नांवर सविस्तर उत्तर दिलं. “पोलिसांनी चौकशी केलीच पाहिजे. पोलीस याची चौकशी करतील. यासाठी कुणाचीही तक्रार येण्याची गरज नाही. दखलपात्र गुन्हा असेल तर पोलीस त्याची चौकशी करतील”, असं देवेंद्र फडणवीसांनी स्पष्ट केलं.
“काही गुन्हे दखलपात्र असतात, काही अदखलपात्र असतात. त्यानुसार याबाबतची कारवाई होईल. शेवटी किती ताकद लावली गेली, याच्या आधारावर त्या गुन्ह्याचं स्वरूप ठरतं. पोलिसांना कारवाई करू द्या, ते योग्य कारवाई करतील”, असंही देवेंद्र फडणवीस म्हणाले.
संजय गायकवाड मारहाण प्रकरण काय आहे?
मंगळवारी रात्री दहाच्या सुमारास संजय गायकवाड बनियन आणि टॉवेल गुंडाळून आकाशवाणी आमदार निवासाच्या कॅन्टीनमध्ये दाखल झाले. त्यांच्या हातात डाळीची एक पिशवी होती. कॅन्टीनच्या कर्मचाऱ्यांना ते पिशवीतल्या डाळीचा वास घ्यायला सांगत होते. एका कर्मचाऱ्याला त्यांनी अशीच पिशवी नाकाशी नेऊन वास घ्यायला सांगितलं. त्यांच्यात काही शब्दांचीच देवाण-घेवाण झाली असेल-नसेल तोच संजय गायकवाड यांनी त्याला मारहाण करायला सुरुवात केली. आधी कानाखाली आणि नंतर थेट ठोसे लागवले. यात तो कर्मचारी खाली पडला. नंतर काही कार्यकर्त्यांनी संजय गायकवाड यांना तिथून बाजूला केलं.
संजय गायकवाड भूमिकेवर ठाम
संजय गायकवाड यांच्या या कृतीवर खुद्द मुख्यमंत्री देवेंद्र फडणवीस यांनी भर सभागृहात नाराजी व्यक्त केली. आमदारांनी असं वर्तन करणं चूक असल्याचं ते म्हणाले. एकनाथ शिंदे यांनीदेखील संजय गायकवाड यांना समज दिल्याचं सांगितलं. मात्र, त्यानंतरदेखील संजय गायकवाड यांनी प्रसारमाध्यमांशी बोलताना आपल्या वर्तनाचं समर्थन केलं. शिवाय, दक्षिण भारतातील या लोकांनी महाराष्ट्रातील लोकांच्या आरोग्याशी खेळ चालवला असल्याचीही प्रतिक्रिया दिली.
कॅन्टीनचालक केटररचा परवाना रद्द
दरम्यान, एकीकडे संजय गायकवाड यांच्यावर अद्याप कोणतीही कारवाई झालेली नसताना दुसरीकडे संबंधिक कॅन्टीन चालकाचा परवाना अन्न व औषध प्रशासनाकडून रद्द करण्यात आला आहे. या केटररला कोणत्याही प्रकारे अन्नपदार्थ तयार करणे, विकणे वा वितरीत करण्यावर बंदी घालण्यात आली आहे.