“लाडक्या बहिणींना २१०० रुपये मिळणार?” अर्थसंकल्पाआधी रोहित पवारांनी राज्य सरकारला आश्वासनांची आठवण करून दिली

दरम्यान, राष्ट्रवादी काँग्रेस पार्टी शरदचंद्र पवार या पक्षाचे आमदार रोहित पवार यांनी राज्य सरकारना त्यांनी निवडणुकीच्या आधी दिलेल्या आश्वासनांची आठवण करून दिली आहे.रोहित पवार यांनी एक्स या मायक्रोब्लॉगिंग प्लॅटफॉर्मवर एक पोस्ट केली आहे. या पोस्टमध्ये त्यांनी म्हटलं आहे की आज राज्याचा अर्थसंकल्प सादर होत असताना महायुतीने निवडणुकीत दिलेल्या आश्वासनांची आठवण करुन देणं क्रमप्राप्त आहे. या आश्वासनांचं प्रतिबिंब अर्थसंकल्पात दिसेल, अशी अपेक्षा आहे.

राज्य सरकारने दिलेल्या प्रमुख आश्वासनांची यादी रोहित पवार यांनी दिली आहे.

• लाडक्या बहिणींना दरमहा २,१०० रुपयांचा हप्ता
• महिला सुरक्षेसाठी २५ हजार महिलांची पोलीस भरती.
• शेतकरी कर्जमाफी आणि शेतकरी सन्मान योजनेद्वारे वर्षाला १५ हजार रुपये
• पिकांच्या किमान आधारभूत किंमतीवर (एमएसपी) २० टक्के अनुदान
• वृद्धांना महिन्याला १,५०० रुपयांवरून २,५०० रुपयांचा हप्ता
• अंगणवाडी आणि आशा सेविकांना १५ हजार रुपये मानधन आणि विमा संरक्षण.
• १० लाख विद्यार्थ्यांना १०,००० रुपये विद्यावेतन आणि २५ लाख रोजगार निर्मिती.

राज्याचे उपमुख्यमंत्री तथा अर्थमंत्री अजित पवार आज (सोमवार, १० मार्च) दुपारी २ वाजता विधानसभेत राज्याचा आर्थिक वर्ष २०२५-२६ साठीचा अर्थसंकल्प सादर करतील. ‘नमो शेतकरी सन्मान योजने’त वार्षिक तीन हजार रुपये वाढ करून ते १५ हजार रुपये करण्याची घोषणा मुख्यमंत्री देवेंद्र फडणवीस यांनी आधीच केली असल्याने याचा अर्थसंकल्पात समावेश असण्याची शक्यता आहे.