सातारा : आज बुधवारपासून सातारा शहरात व जिल्ह्यात वाजत गाजत अतिशय उत्साहात घरगुती गणेशमूर्तींचे स्वागत होणार आहे. गणरायाच्या आगमनाची तयारी पूर्ण झाली आहे. घरगुती गणपती मूर्ती मंगळवार सायंकाळपासून घरी नेण्यास मोठा उत्साह दिसून येत आहे. सार्वजनिक गणेशोत्सव मंडळांकडून सायंकाळपर्यंत मूर्तीची प्रतिष्ठापना केली जाणार आहे. यासाठी मंडळांकडून ढोल-ताशा आणि बँड पथकांसह मिरवणुकीची आज तयारी सुरू होती. दरम्यान उद्या सकाळी मुहूर्तावर प्रतिष्ठापना करण्यासाठी अनेक ठिकाणी घरगुती गणेशाचे ‘गणपती बाप्पा मोरया, मंगलमूर्ती मोरया’च्या जयघोषात मंगळवारीच आगमन करण्यात आले.

आज बुधवारपासून सातारा शहरात व जिल्ह्यात वाजत गाजत अतिशय उत्साहात घरगुती गणेश मूर्तींचे स्वागत होणार आहे. गणरायाच्या आगमनाची तयारी पूर्ण झाली आहे. घरगुती गणपती मूर्ती मंगळवार सायंकाळपासून घरी नेण्यास मोठा उत्साह दिसून येत आहे. अधून मधून पडणाऱ्या रिमझिम सरींच्या पावसात बाजारात खरेदीसाठी मोठी गर्दी दिसत होती. सातारा शहरातील मोती चौक, राजवाडा, पोवई नाका परिसरात गणेश पूजेसाठी लागणाऱ्या विविध वस्तू तसेच गणेशाला आवडणारी विविध पत्री, कमळे, केवडा, दूर्वा याचबरोबर २१ पत्रींमध्ये बेल, तुळस, आघाडा, माका, विष्णुकांत, शमी यांसारख्या पत्रीचीही खरेदी करण्यासाठी ग्राहकांची गर्दी झाली होती.

सणवार म्हटले की फुलांच्या जणांना मोठा भाव येतो, त्यामुळे सातारा शहरातील अनेक फुलविक्रेत्यांकडे फुलांच्या पूजेसाठी हार तसेच केवडा, गुलाब, शेवंती यांसारख्या फुलांना मोठी मागणी होती. दोनशे रुपये ते आठशे रुपये किलो दराने ही फुले मोठ्या प्रमाणात विक्री होत होती.

शहरातील प्रमुख रस्त्यांवर खरेदीसाठी बाहेर पडलेल्या सातारकरांमुळे वाहतूक कोंडीचा प्रत्यय वारंवार दिसून येत होता. वाहतूक शाखेचे पोलीस कर्मचारी तसेच स्वयंसेवकही ही वाहतूक सुरळीत करण्यासाठी आटोकाट प्रयत्न करताना दिसत होते. मात्र वारंवार वाहतूक कोंडीमुळे वाहन चालकांना अक्षरश: मुख्य रस्ते सोडून छोट्या मार्गाचा तसेच बोळातूनच इकडून तिकडे जाण्याचा प्रसंग येत होता. अनेक सार्वजनिक गणेश मंडळांनी आपल्या मंडळाच्या गणेशमूर्ती मागील आठवड्यापासूनच वाजत गाजत मंडपामध्ये आणून प्रतिष्ठापना करण्यासाठी आणून ठेवलेल्या आहेत.

हेही वाचा

त्यामुळे अनेक रस्त्यांत मंडपाचे काम अपूर्ण असतानाही या मूर्ती पडदा आणि कापड टाकून झाकून ठेवण्यात आलेल्या आहेत. बुधवारी पहाटेपासून दुपारी पावणेदोनपर्यंत घरगुती गणेशमूर्ती प्रतिष्ठापनेचा मुहूर्त सांगितल्यामुळे सकाळी लवकरच या गणेशमूर्ती घरोघरी आरत्या आणि स्तोत्रांच्या जयघोषात प्रतिष्ठापना केल्या जाणार आहेत. एकंदरीतच दरवर्षी गणेशोत्सव हा मोठा अल्हाददायक आणि उत्साहवर्धक असा हा उत्सव असल्यामुळे सातारा शहरात ऐतिहासिक अशा शाहू नगरीत एक वेगळेच मांगल्यमय वातावरण दिसून येत आहे.