अभिनेत्री विद्या बालनने आजवर बॉलिवूडला अनेक सुपरहिट चित्रपट दिले. तिच्या अभिनयाचे लाखो चाहते आहेत. पण त्याचबरोबरीने विद्याच्या सौंदर्याचेही सगळेच जण तोंडभरुन कौतुक करतात. सध्या ती चित्रपटसृष्टीपासून दूर असली तरी सोशल मीडियाद्वारे चाहत्यांच्या संपर्कात असते. विद्याने बॉलिवूडमध्ये पदार्पण केल्यानंतर स्वतःला सिद्ध करण्यासाठी प्रचंड मेहनत घेतली. पण या प्रवासादरम्यान तिला अनेक कठिण प्रसंगांचाही सामना करावा लागला.
आणखी वाचा – Video : ४५ वर्षांची मैत्री तुटली! सतीश कौशिक यांच्या पार्थिवाजवळ बसून ढसाढसा रडले अनुपम खेर, व्हिडीओ व्हायरल
कास्टिंग काऊच सारख्या प्रकाराचा अनेक अभिनेत्रींनी सामना केला आहे. याचबाबत विद्यानेही अलिकडे दिलेल्या एका मुलाखतीमध्ये भाष्य केलं आहे. विद्याने सांगितलं की, “माझ्याबरोबर घडलेला एक प्रकार मला अजूनही आठवतो. मी एक चित्रपट साइन केला होता. एका जाहिरातीचं चित्रीकरण करण्यासाठी मी चेन्नईमध्ये गेले होते. त्याचदरम्यान ज्या चित्रपटासाठी मी होकार दिला त्याच चित्रपटाच्या दिग्दर्शकाने मला भेटायला बोलावलं”.
“चित्रपटासाठी होकार कळवला म्हणून मीही त्या दिग्दर्शकाला भेटायला गेले. आम्ही एका कॉफी शॉपमध्ये भेटलो. पण एका रुममध्ये चल यासाठी ते मला जबरदस्ती करू लागले. मी एकटीच होते. पण मी एक युक्तीवाद केला. जेव्हा आम्ही एका रुममध्ये गेलो तेव्हा त्या रुमचा दरवाजा मी उघडा ठेवला. त्यामुळेच त्या दिग्दर्शकाने माझ्याबरोबर कोणतंच वाईट कृत्य केलं नाही”.
पुढे ती म्हणाली, “दिग्दर्शकाने मला कोणताच इशारा केला नाही. पण त्याच्या वागण्यामधून आपण इथे सुरक्षित नाही याची जाणीव मला झाली होती. मला त्या रुममधील वातावरणही आवडलं नव्हतं. परिणामी माझ्या हातून तो चित्रपटही गेला”. विद्याने त्या दिग्दर्शकाचं नाव न सांगता हा धक्कादायक प्रकार सगळ्यांसमोर सांगितला.