Aftab Shivdasani On Drug Case Rumors : बॉलीवूड आणि ड्रग्ज हे कनेक्शन अनेक वेळा समोर आलं आहे. बॉलीवूडच्या अनेक कलाकारांची ड्रग्ज केसमध्ये नावे आली आहेत. अनेकदा काही कलाकारांचा या ड्रग्ज केसशी थेट संबंध नसतो, पण अनेक कलाकारांच्या नावांच्या अफवा पसरतात. अशाच एका ड्रग्ज केसमध्ये नाव आलेल्या अभिनेत्याने संबंधित प्रकरणावर पहिल्यांदाच त्याची प्रतिक्रिया दिली आहे.
बॉलीवूड अभिनेता आफताब शिवदासानीचं ड्रग्ज केसमध्ये नाव आल्याच्या अफवा पसरल्या होत्या. याबद्दल त्यानं प्रतिक्रिया दिली आहे. अभिनेता सध्या आपल्या आगामी चित्रपट ‘मस्ती ४’चं प्रमोशन करत आहेत. अशातच झूमबरोबरच्या एका मुलाखतीत, आफताब त्याच्या ड्रग्जच्या आरोपांवर आणि सेटवर अ‍ॅटिट्यूड दाखवण्याच्या अफवांवर प्रतिक्रिया दिली आहे.
ड्रग्ज केसवर आफताब शिवदासानी म्हणाला, “मी माझ्याबाबतीत ऐकलेली ही सर्वात मजेशीर अफवा आहे.” या अफवा ऐकूनही तो शांत कसा राहतो? असं त्याला विचारण्यात आलं. त्यावर आफताब म्हणाला, “सत्य आवाज करत नाही हे मी आयुष्यात खूप आधीच शिकलो होतो. सत्य नेहमी शांत असतं. त्याला स्वतःला सिद्ध करण्याची गरज नसते. फक्त हीच थिअरी ध्यानात ठेवा, म्हणजे कोणालाच सिद्ध करण्याची गरज नसते.”
पुढे तो म्हणाला, “मी कधीच स्वतःविषयी काही बोलत नाही. एका कानाने ऐकतो आणि दुसऱ्या कानाने सोडून देतो. कारण जे खोटं आहे; त्यावर विचार करुन मी माझी झोप का खराब करू? नेमकं सत्य काय, हे मला माहित आहे. जी माझी माणसं आहेत त्यांना सगळंच माहित आहे. मी काहीही न करता लोकांना ते मीच केलं आहे, असं मानायचं असेल तर ते तेच मानणार आहेत.”
आफताब शिवदसानी इन्स्टाग्राम पोस्ट
सेटवर अ‍ॅटिट्यूड दाखवण्याच्या अफवांवर आफताबचं स्पष्ट मत
आफताबने पुढे सेटवर अ‍ॅटिट्यूड दाखवण्याच्या अफवांवर सांगितलं की, “जर त्यांनी सेटवर अ‍ॅटिट्यूड दाखवला असता, तर मी इंडस्ट्रीत टिकलोच नसतो. तसंच माझे अनेक दुश्मनही झाले असते. लोक माझ्याबद्दल वाईट बोलले असते. पण एक बरं आहे की, लोकांना मी आवडत नसलो तरी त्यांच्या मनात माझ्याबद्दलही काही राग नाही किंवा द्वेष नाही.”
आफताब शिवदसानी लवकरच ‘मस्ती ४’ या चित्रपटातून प्रेक्षकांच्या भेटीला येणार आहे. यात त्याच्यासह मराठी अभिनेता रितेश देशमुख आणि विवेक ओबेरॉय हे मुख्य भूमिकांत आहेत. तसेच श्रेया शर्मा, रुही सिंह, एलनाज नोरोजी, तुषार कपूर, शाद रंधावा आणि निशांत मल्कानी यांच्याही प्रमुख भूमिका आहेत.
दरम्यान, ‘मस्ती ४’ या चित्रपटातून आफताबचा बॉलीवूडमध्ये सहा वर्षांच्या ब्रेकनंतर कमबॅक करत आहे. आफताब शिवदासानी, रितेश देशमुख आणि विवेक ओबेरॉय यांचा हा ‘मस्ती ४’ हा चित्रपट येत्या २१ नोव्हेंबर २०२५ रोजी प्रदर्शित होत आहे.