बॉलिवूडमधील अभिनेत्री आणि त्यांचे करियर कायमच चर्चेचा विषय बनतो. काही अभिनेत्रींचे करियर अवघ्या एक दोन चित्रपटानंतर संपून जाते तर काही अभिनेत्री सातत्याने हिट चित्रपट देत असतात. अभिनेत्री परिणीती चोप्रा सध्या चर्चेत आहे. नुकताच तिचा कोड नेम हा चित्रपट प्रदर्शित झाला आहे. या चित्रपटाला फारसे यश मिळाले नाही. याआधी तिचे साईना, नमस्ते इंग्लंड, जबरिया जोडी या चित्रपटांना फारसे यश मिळाले नाही.
नुकतीच तिने इंडिया टुडेला मुलाखत दिली आहे. या मुलाखतीत तिने आपल्या अपयशाबद्दल सांगितले आहे, ती असं म्हणाली की ‘माझ्यासाठी माझ्या यशाचे मोजमाप म्हणजे बॉक्स ऑफिसवरची कमाई नव्हे तर प्रेक्षकांच्या येणाऱ्या प्रतिक्रिया माझ्यासाठी पुरेशा आहेत’. ती पुढे म्हणाली ‘मला आयुष्यात पहिल्यांदाच अपयश पाहावं लागलं. जागतिक स्तरावर आपण अपयश पाहतो. अपयश तुमच्या आयुष्याला शिकवून जात. मी आज आनंदी आहे ते यामुळेच म्हणून मी कोड नेमसारखा चित्रपट निवडला’.
परिणितीने आपल्या करियरची सुरवात यशराज फिल्म्समध्ये जनसंपर्क विभागातून केली आहे. ‘लेडीज वर्सेस बेहल’ या चित्रपटातून तिने पदार्पण केले. त्यानंतर ‘इशकजादे’, ‘हसी तो फसी’, ‘केसरी’, ‘शुध देशी रोमान्स’ यांसारख्या वेगवेगळ्या धाटणीच्या चित्रपटांमधून तिने काम केले आहे. ‘गोलमाल ४’ चित्रपटातून ती एक वेगळ्या भूमिकेतून दिसली होती.
परिणीती आता राजश्री प्रॉडक्शनच्या ‘उंचाई’ चित्रपटात झळकणार आहे. नुकताच या चित्रपटाचा ट्रेलर प्रदर्शित झाला आहे. परिणीतीच्या बरोबरीने अमिताभ बच्चन, अभिनेता बोमन इराणी, अभिनेत्री नीना गुप्ता, सारिका, डॅनी डेंग्झोपा, नफीसा अली यांच्या चित्रपटात महत्वाच्या भूमिका आहेत.