“ती भारतातील सर्वात…” पती सॅम बॉम्बेने केलं पूनम पांडेच्या पब्लिसिटी स्टंटचं समर्थन

पूनम पांडेने स्वत: इन्स्टाग्राम पोस्ट शेअर करत यासंदर्भात माहिती दिली आहे. “मी जिवंत आहे, कर्करोगामुळे माझा मृत्यू झालेला नाही” असं तिने या व्हिडीओद्वारे स्पष्ट केलं आहे. याशिवाय यामध्ये तिने सर्वांची माफी मागितली आहे. सरव्हायकल कॅन्सर या गंभीर आजाराबद्दल जागरूकता पसरवण्यासाठी पूनम आणि तिच्या पीआर टीमने हे पाऊल उचललं होतं हे तिने तिच्या सोशल मीडिया पोस्टमधून स्पष्ट केलं. तरुण मुलींनी या आजारावरची लस घ्यावी अन् त्याविषयी लोकांमध्ये चर्चा व्हावी यासाठी पूनमने स्वतःच्या मृत्यूचं हे नाटक रचल्याचं कबूल केलं.

आणखी वाचा : “मी चालत होते अन् मागून कुणीतरी माझ्या…”, भूमी पेडणेकरने सांगितला वयाच्या १४ व्या वर्षी आलेला ‘तो’ भयानक अनुभव

तिच्या या उत्तरानंतर सोशल मीडियावर तिला लोकांनी चांगलंच धारेवर धरलं आहे. इतक्या खालच्या थराला जाऊन केवळ पब्लिसिटीसाठी असा स्टंट करणाऱ्या पूनमला अटक करायला हवी अशी मागणी काहींनी केली आहे. मनोरंजनसृष्टीतील बऱ्याच लोकांनी पूनमची कानउघडणी केली आहे. तर पूनमने ज्याच्याशी काही वर्षांपूर्वी लग्न केलेलं त्या सॅम बॉम्बेने या गोष्टीवर मौन सोडलं आहे. लग्नानंतर लगेचच काही महिन्यात पूनमने सॅम बॉम्बेकडून घटस्फोट घेतला होता. आता पूनमच्या या पब्लिसिटी स्टंटनंतर सॅमने यावर त्याचं मत मांडलं आहे.

हिंदुस्तान टाइम्सशी संवाद साधताना सॅम म्हणाला, “ती जीवंत आहे हे ऐकूनच मला आनंद झाला आहे. माझी एक गोष्ट नीट लक्षात ठेवा जर एखादा सेलिब्रिटी त्याला मिळणारं फेम ग्लॅमर, प्रतिमा बाजूला ठेवून एखाद्या गंभीर समस्येबद्दल जनजागृती करत असेल तर आपण त्याचा आदर करायला हवा. पूनम पांडे हे भारतातील सर्वात बोल्ड महिला आहे, आजपासून पुढील कित्येक वर्षं तिच्या या कृतीची चर्चा होईल व साऱ्या जगात याची दखल घेतली जाईल.” सॅम बॉम्बेची ही प्रतिक्रिया ऐकून बऱ्याच लोकांना धक्का बसला आहे. एकीकडे लोक, सेलिब्रिटीज पूनमच्या या वागण्यावर टीका करत आहेत तर दुसरीकडे पूनमचा पूर्व पती मात्र तिच्या य कृतीचं समर्थन करताना दिसत आहे.