“कतरिना कैफशी केलेल्या तुलनेने माझे करिअर उद्ध्वस्त झाले”, झरीन खानचे वक्तव्य चर्चेत

झरीन खान काय म्हणाली?

प्रसिद्ध कॉमेडियन भारती आणि हर्ष लिंबाचिया यांच्या पॉडकास्टमध्ये झरीन खानने हजेरी लावली होती. यामध्ये तिने आपल्या करिअरबद्दल वक्तव्य केले आहे. ‘वीर’ चित्रपटानंतर तिचा करिअरचा अनुभव कसा होता हे सांगताना ती म्हणते, “‘वीर’ चित्रपटानंतर माझे आयुष्य पूर्णपणे बदलले आहे. तो चित्रपट खूप मोठा होता आणि आतासुद्धा माझ्यासाठी माझे आयुष्य बदलणारा चित्रपट आहे. त्या चित्रपटानंतर मला वाईट अनुभव आले आहेत. माझी तुलना कतरिना कैफबरोबर केली जात होती. सुरुवातीला मला छान वाटले, कारण कतरिना खूप सुंदर आहे. पण, मला वाटते की ही गोष्ट इंडस्ट्रीमध्ये चुकीच्या पद्धतीने पसरली. माझ्यासाठी कतरिनाबरोबर तुलना होणे ही गोष्ट खूप मोठी होती, पण ती वाईट ठरली. या इंडस्ट्रीमधल्या अनेक लोकांना मी ओळखत नाही. अनेक दिग्दर्शक आणि निर्माते यांना फक्त मी त्यांच्या नावाने ओळखते. पण, सलमान खानने मला चित्रपटात आणले आहे म्हणून मी गर्विष्ठ आहे, असा अनेकांचा समज झाला.”

हेही वाचा: “तोंडावर लाली पावडर नाही केली तर भयानक…”, म्हणणाऱ्या नेटकऱ्याला ऐश्वर्या नारकरांनी सुनावलं, म्हणाल्या…

झरीन खान पुढे बोलताना म्हणते की, माझ्यावर इतक्या मोठ्या प्रमाणात टीका होत होती की एक वेळ अशी आली, मला घराबाहेर पडणे अशक्य होऊ लागले. लोक माझ्या कपड्यांवर कंमेट करू लागले. माझे वजन जास्त आहे, असेही म्हटले गेले. मी काय करणार होते? मला अनेक नावे दिली गेली. त्यामुळे मला घरात बसून राहणे जास्त सोयीस्कर वाटू लागले. कतरिनासोबत केलेली तुलना माझ्यासाठी वाईट ठरली.

झरीन खानने सलमान खानच्या २०१० मध्ये प्रदर्शित झालेल्या ‘वीर’ चित्रपटातून मुख्य भूमिकेतून बॉलीवूडमध्ये पदार्पण केले होते. ‘वीर’ चित्रपटानंतर ‘कॅरक्टर ढीला’ या गाण्यातून तिला मोठी प्रसिद्धी मिळाली होती. याबरोबरच, ‘हाऊसफुल २’ या चित्रपटातील तिच्या भूमिकेचे मोठे कौतुक झाले. याशिवाय, झरीनने ‘हेट स्टोरी ३’, ‘अक्सर २’, ‘१९२१’ अशा अनेक चित्रपटांत आपल्या अभिनयाची झलक दाखवली आहे.