Shivali Parab Dance Video : ‘कल्याणची चुलबुली’ अभिनेत्री शिवाली परब कधी तिच्या हटके डान्स व्हिडीओमुळे, तर कधी सुंदर फोटोशूटमुळे चर्चेत असते. ‘महाराष्ट्राची हास्यजत्रा’ या शोमुळे शिवालीला घराघरांत एक वेगळी ओळख मिळाली. अल्पावधीतच तिने प्रेक्षकांचं मन जिंकून घेतलं. शिवाली सोशल मीडियावर कायम सक्रिय असते. तिने नुकत्याच शेअर केलेल्या डान्स व्हिडीओने सध्या सर्वांचं लक्ष वेधून घेतलं आहे.
शिवाली परबने बॉलीवूडचा भाईजान सलमान खानच्या गाण्यावर जबरदस्त डान्स केला आहे. सलमान खान त्याचा डॅशिंग अंदाज अन् स्वॅगसाठी ओळखला जातो. शिवालीने सुद्धा भाईजानच्या गाण्यावर डान्स करताना डॅशिंग लूक केल्याचं पाहायला मिळालं.
शिवाली सलमान खानच्या “तुझे अक्सा बीच घुमा दूं आ चलती क्या…” या गाण्यावर थिरकली आहे. सध्या हे गाणं सोशल मीडियावर ट्रेंड होत आहे. भाईजानच्या १७ वर्षांपूर्वी प्रदर्शित झालेल्या ‘गॉड तुस्सी ग्रेट हो’ या सिनेमातलं हे गाणं आहे. यामध्ये सलमान खान, प्रियांका चोप्रा, बिग बी अमिताभ बच्चन, सोहेल खान, संजय मिश्रा यांसारख्या दिग्गजांच्या भूमिका होत्या. याच गाण्यावर आता शिवालीने ठेका धरला आहे.
या व्हिडीओमध्ये शिवालीसह प्रसिद्ध कोरिओग्राफर रुपेश बने थिरकल्याचं पाहायला मिळत आहे. अभिनेत्री चेतना भटसह नेटकऱ्यांनी शिवालीच्या या डान्स व्हिडीओवर कमेंट्सचा पाऊस पाडला आहे. “फक्त आणि फक्त स्विट”, “सुंदर शिवा”, “वाह वाह काय डान्स केलाय” अशा प्रतिक्रिया या डान्स व्हिडीओवर चाहत्यांकडून आल्या आहेत.
दरम्यान, शिवालीच्या वर्कफ्रंटबद्दल सांगायचं झालं तर, ती सध्या ‘महाराष्ट्राची हास्यजत्रा’ या कार्यक्रमात काम करतेय. यासह गेल्या काही वर्षांत ती अनेक चित्रपटांमध्येही झळकली आहे. काही दिवसांपूर्वी शिवाली अन् रुपेश बने यांचा ‘वेड’ सिनेमाच्या टायटल ट्रॅकवर बनवलेला सिनेमॅटिक रील व्हिडीओ सर्वत्र व्हायरल झाला होता.