सीएसएमटीवरून २४ डब्यांची गाडी धावणार, फलाटांचे विस्तारीकरण अंतिम टप्प्यांत

सीएसएमटी फलाट क्रमांक १० ते १४ च्या विस्ताराला २०१५-१६ साली मंजुरी मिळाली. प्रकल्पाची एकूण किंमत ६२.१२ कोटी रुपये अपेक्षित आहे. सध्या फलाट क्रमांक १०, ११ चा विस्तार झाला असून १२, १३ क्रमांकाच्या फलाटांची दुरुस्ती सुरू आहे. सर्व पायाभूत कामे नोव्हेंबर २०२४ पूर्ण करण्याचे लक्ष्य मध्य रेल्वेने निश्चित केले आहे. त्यानंतर १० ते १३ या फलाटांवरून २४ डब्यांची रेल्वेगाडी धावण्यास सज्ज होईल. त्यामुळे साधारणपणे ८ रेल्वेगाड्यांच्या डब्यात वाढ होणार आहे, असे मध्य रेल्वेच्या वरिष्ठ अधिकाऱ्याने सांगितले.

हेही वाचा – विशेष तिकीट तपासणी : विनातिकीट प्रवास करणाऱ्या १,२७३ प्रवाशांकडून चार लाख दंड वसूल

लोकमान्य टिळक टर्मिनसचा विस्तार करण्याची योजना आखण्यात आली आहे. सध्या एलटीटी येथे सात फलाट असून येथून दररोज ५२ रेल्वेगाड्यांची ये-जा होते. तर, दररोज सुमारे ७० हजार प्रवाशांचा प्रवास होतो. चार अतिरिक्त फलाटांचे बांधकाम झाल्यास एलटीटीमध्ये रेल्वेगाड्यांची ये-जा आणि प्रवाशांच्या रहदारीची क्षमता वाढेल.

सीएसएमटीवरील रेल्वेगाड्यांचा भार कमी करण्यासाठी आणि लोकल फेऱ्यांच्या संख्येत वाढ करण्यासाठी २०१६ साली परळ येथे टर्मिनस बांधण्याचा प्रस्ताव आहे. मात्र, अनेक कारणामुळे हे काम रखडलेले आहे. आता पुन्हा नव्याने मध्य रेल्वेच्या अधिकाऱ्यांनी रेल्वे मंडळाकडून परळ टर्मिनस बांधण्याबाबत मंजुरी प्राप्त करणार आहेत.

हेही वाचा – मुंबई – अयोध्या विशेष रेल्वेगाडी

सीएसएमटी येथील फलाट विस्तारीकरणाचे काम नोव्हेंबर २०२४ पर्यंत पूर्ण होण्याची शक्यता आहे. तसेच लांब पल्ल्याच्या रेल्वेगाड्यांसाठी नवीन अत्याधुनिक टर्मिनस परळ येथे बांधण्याचे प्रस्तावित आहे. हा प्रस्ताव रेल्वे मंडळाकडे मंजुरीसाठी पाठवला जाणार आहे. तसेच, एलटीटी अतिरिक्त फलाट उभे करण्याचे काम सुरू आहे. कल्याण येथील यार्ड री -माॅडेलिंगच्या कामाला गती देण्यात येत आहे. हे काम येत्या दीड वर्षात पूर्ण होणे अपेक्षित आहे. – राम करण यादव, महाव्यवस्थापक, मध्य रेल्वे