मुंबई : एल.एस.जी.डी. आणि एल.जी.एस. हे प्रशासकीय अभ्यासक्रम पूर्ण करणाऱ्या महापालिकेतील लिपिकीय व निरीक्षकीय संवर्गातील कर्मचाऱ्यांची वेतनवाढ बंद करण्याच्या निर्णयाविरोधात येत्या २६ सप्टेंबर रोजी दि म्युनिसिपल युनियनतर्फे मुंबई मराठी ग्रंथसंग्रहालयातील सुरेद्र गावस्कर सभागृहात मेळावा आयोजित करण्यात आला आहे. जुन्या पेन्शन योजनेतील सेवानिवृत्ती वेतनाचा भाग लागू करण्यात न आल्यामुळे कर्मचाऱ्यांमध्ये नाराजी पसरली आहे.
एल.एस.जी.डी. आणि एल.जी.एस. हे प्रशासकीय अभ्यासक्रम यशस्वीरित्या पूर्ण करणाऱ्या मुंबई महापालिकेतील लिपिकीय व निरीक्षकीय संवर्गातील कर्मचारी व अधिकाऱ्यांना १९६७ पासून विशेष वेतनवाढ देण्यात येत होती. ही वेतनवाढ वर्षानुवर्षे त्यांच्या सेवाशर्तीनुसार देण्यात येत होती. मात्र, महापालिका प्रशासनाने ५ जानेवारी रोजी परिपत्रक काढून संबंधितांची वेतनवाढ बंद करण्याचा निर्णय घेतला.
पालिकेने २९ ऑगस्टपासून वेतनवाढ कायमस्वरूपी बंद करण्याचा निर्णय घेतला आहे. मात्र, हा निर्णय बेकायदेशीर आणि एकतर्फी असल्याचा आरोप द म्युनिसिपल युनियनने केला आहे. हा निर्णय घेण्यामध्ये मुंबई महानगरपालिका व संबंधित प्रशासकीय अधिकाऱ्यांची हेकेखोरी दिसून येत असल्याचीही टीका युनियनने केली आहे. त्यामुळे केवळ न्यायालयाचे दार ठोठाण्याऐवजी प्रत्यक्ष रस्त्यावर उतरावे लागेल, असे मत युनियनच्या पदाधिकाऱ्यांनी व्यक्त केले.
तसेच, ५ मे २००८ पासून महापालिकेत नियुक्त झालेल्या कर्मचाऱ्यांचा जुन्या पेन्शन योजनेचा प्रश्नही प्रलंबित आहे. दरम्यानच्या काळात उपदान, जुन्या पेन्शनचा भाग असलेला कुटुंब निवृत्ती वेतन आणि असमर्थता निवृत्ती वेतन लागू करून घेण्यात यश आले आहे. असे असले तरीही जुन्या पेन्शन योजनेतील सेवानिवृत्ती वेतनाचा भाग अद्यापही लागू झालेला नाही, अशी खंत त्यांनी व्यक्त केली.