मुंबई : देशात नोव्हेंबर – डिसेंबर २०२४, या दोन महिन्यांत खाद्यतेलाच्या आयातीत १६ टक्क्यांनी वाढ झाली आहे. प्रामुख्याने सूर्यफूल आणि सोयाबीनच्या आयातीत वाढ तर दरवाढीमुळे पामतेलाच्या आयातीत घट झाली आहे.

आर्काइव्हमधील सर्व बातम्या मोफत वाचण्यासाठी कृपया रजिस्टर करा

द सॉल्व्हंट एक्स्ट्रॅक्टर्स असोसिएशन ऑफ इंडियाने दिलेल्या माहितीनुसार, नोव्हेंबर – डिसेंबर २०२४ मध्ये २८ लाख ५९ हजार ०६८ टन खाद्यतेलाची आयात झाली आहे. नोव्हेंबर – डिसेंबर २०२३ मध्ये २४ लाख ७२ हजार २७६ टन खाद्यतेलाची आयात झाली होती. २०२३ च्या तुलनेत २०२४ मध्ये खाद्यतेल आयात १६ टक्क्यांनी वाढली आहे. पामतेलाची आयात प्रामुख्याने मलेशियातून होते, पण, मलेशियाने निर्यातीवर निर्बंध लागू केल्यामुळे जागतिक बाजरात पामतेलाच्या दरात वाढ झाली आहे. सोयाबीन आणि सूर्यफूल तेलापेक्षाही पामतेलाचे दर वाढल्यामुळे पामतेलाची आयात घटली आहे. आयातदारांनी पामतेलाऐवजी सोयाबीन, सूर्यफूल तेलाच्या आयातीला प्राधान्य दिले आहे. दरम्यान, एक डिसेंबर रोजी देशात खाद्यतेलाचा एकूण साठा २५ लाख ६९ हजार टन इतका होता.

हेही वाचा >>>पीकविमा योजनेत अमूलाग्र बदल, कृषिमंत्र्यांकडून संकेत, विरोधकांची टीका

यंदा जगभरात सोयाबीनचे उत्पादन चांगले आहे. अर्जेंटिनाने मोठ्या प्रमाणावर सोयाबीनचे गाळप सुरू केल्यामुळे जागतिक खाद्यतेल बाजारावर सोयाबीन तेलाचा दबाव आहे. शिवाय जागतिक बाजारात सोयाबीन पेंडीची मुबलक प्रमाणावर उपलब्धता असल्यामुळे देशातून होणाऱ्या सोयाबीन पेंडीच्या निर्यातीत दहा टक्क्यांनी घट झाली आहे. २०२३ मध्ये ५ लाख ३२ हजार ७२९ टन पेंडीची निर्यात झाली होती. तर २०२४ मध्ये ३ लाख ९८ हजार ७३१ टन पेंडीची निर्यात झाली आहे. २०२३ च्या तुलनेत २०२४ मध्ये पेंडीची निर्यात दहा टक्क्यांनी घटली आहे. दक्षिण कोरिया, व्हिएतनाम, थायलंड, बांगलादेश, इराण आणि तैवानला सर्वांधिक निर्यात झाली असून, पशू आणि कोंबडी खाद्यासाठी सोयाबीन पेंडीचा वापर केला जातो. 

हेही वाचा >>>स्तन व गर्भाशयमुख कर्करोग निदानासाठी तपासणी मोहीम राबवा – आरोग्यमंत्री

पेंडीला दर नसल्यामुळे सोयाबीनचे दर पडले

जागतिक बाजारात सोयाबीन तेल आणि सोयाबीन पेंडीचा दबाव आहे. त्यामुळे देशातून होणारी सोयाबीन पेंडीची निर्यात घटली आहे. सोयाबीन पेंडीला दर मिळत नसल्यामुळे बाजारात सोयाबीनचे दर पडले आहेत, असे मत द सॉल्व्हंट एक्स्ट्रॅक्टर्स असोसिएशन ऑफ इंडियाचे कार्यकारी अध्यक्ष डॉ. बी. व्ही. मेहता यांनी व्यक्त केले.

Mumbai News (मुंबई न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Edible oil imports increase by 16 percent what was the impact of the increase in palm oil prices mumbai print news amy