मुंबई : राज्यातील विद्युत वाहन उद्योगाला व वाहनधारकांना चालना देण्यासाठी पथकर नाक्यावर पथकर माफी देण्याचे धोरण मुख्यमंत्री देवेंद्र फडणवीस, उपमुख्यमंत्री एकनाथ शिंदे व उपमुख्यमंत्री अजित पवार यांच्या मार्गदर्शनाखाली राज्य शासनाने घेतले होते. त्यानुसार अटल सेतूसह मुंबई -पुणे द्रुतगती महामार्ग, तसेच समृद्धी महामार्गावरील सर्व पथकर नाक्यांवर विद्युत वाहनांना पथकर माफी करण्यात येत असल्याची अधिसूचना राज्य सरकारने जारी केली आहे, अशी माहिती परिवहन मंत्री प्रताप सरनाईक यांनी दिली.
वाढत्या इंधन खर्चामुळे वाहनचालक विद्युत वाहनांकडे वळत आहेत. तसेच पेट्रोल, डिझेलच्या वाहनांमुळे वाढणाऱ्या प्रदूषणामुळे नागरिकांना श्वसनासह अनेक व्याधी होतात. त्यामुळे विद्युत वाहनांचा वापर करून पर्यावरण संवर्धनासाठी, वाहनांचे उत्पादन व वापराला मोठ्या प्रमाणावर चालना देण्यासाठी राज्य सरकार सक्रिय झाले आहे.
राज्य शासनाने मोटार वाहन कर अधिनियम १९५८ अंतर्गत निर्गमित केलेल्या अधिसूचनेनुसार सर्व प्रकारच्या विद्युत वाहनांना ठराविक मार्गांवरून प्रवास करताना पथकरात सूट देण्यात आली आहे.
शासनाने घेतलेल्या निर्णयानुसार, एम २, एम ३, एम ६ श्रेणीतील विद्युत चारचाकी वाहने, राज्य परिवहन उपक्रम आणि खासगी विद्युत एम ३, एम ६ प्रकारातील बसगाडीला पथकरातून सूट दिली आहे. या वाहनांना राज्यातील ठराविक महामार्ग व मार्गावरील पथकर नाक्यांवरून पथकर कर भरण्यापासून सूट राहील. ही सूट २२ ऑगस्ट २०२५ च्या मध्यरात्रीपासून लागू झाली आहे. शासनाचा हा निर्णय राज्यातील पर्यावरणपूरक वाहतूक व स्वच्छ ऊर्जा वापरास प्रोत्साहन देण्यासाठी महत्त्वपूर्ण ठरणार आहे, असे सरनाईक यांनी सांगितले.