मुंबई : मुंबईत गेल्या काही वर्षात छट पूजेचे प्रस्थ वाढत असून या सणाचाही आता मुंबई महापालिकेवर ताण येणार आहे. महापालिका मुख्यालयात मुंबई उपनगरचे सह पालकमंत्री मंगलप्रभात लोढा आणि भाजपा मुंबई अध्यक्ष आमदार अमित साटम यांनी नुकतीच छट पूजेच्या तयारीचा आढावा घेण्यासाठी बैठक आयोजित केली होती. त्यावेळी मुंबईत ४० ठिकाणी छट पूजेसाठी सोयी सुविधा उपलब्ध करून देण्याचा निर्णय घेण्यात आला.

मुंबई महापालिकेची निवडणूक लवकरच अपेक्षित असून भाजपचे पारंपरिक मतदार असलेल्या उत्तर भारतीयांना खूष करण्यासाठी भाजपच्या नेत्यांनी यंदा हा सण उत्साहात साजरा व्हावा यासाठी नियोजन केले आहे.

गणेशोत्सवाप्रमाणे छटपूजेसाठी विविध पूजा स्थळांवर मोठ्या प्रमाणावर सुविधा मुंबई महापालिकेने द्याव्यात म्हणून महापालिका मुख्यालयात गेल्या आठवड्यात मुंबई उपनगरचे सह पालकमंत्री मंगलप्रभात लोढा आणि भाजपा मुंबई अध्यक्ष आमदार अमित साटम यांनी छट पूजेच्या तयारीचा आढावा घेण्यासाठी बैठक आयोजित केली होती.

हेही वाचा

कधी आहे छटपूजा …

उत्तर भारतीयांचा मोठा सण असलेला छट पूजा हा सण यंदा २७ ऑक्टोबर ते २८ ऑक्टोबर दरम्यान साजरा केला जाणार आहे. दिवाळी झाली की उत्तर भारतीयांना छट पूजेचे वेध लागतात. गेल्या काही वर्षात मुंबईत उत्तर भारतीयांची संख्या वाढली असून छट पूजेचे प्रस्थही वाढले आहे. उत्तर भारतीय हे भाजपचे पारंपरिक मतदार असून पालिका निवडणूकीच्या तोंडावर उत्तर भारतीयांची मते मिळवण्यासाठी भाजपने ही संधी साधली असल्याची चर्चा सुरू आहे. त्याकरीता खास बैठक घेऊन मोठ्या प्रमाणावर सुविधा देण्याचे निर्देश मुंबई महापालिका प्रशासनाला देण्यात आले आहेत.

या बैठकीला मुंबई महापालिकेचे अतिरिक्त आयुक्त अमित सैनी, उपायुक्त प्रशांत सकपाळे, अतिरिक्त पोलीस आयुक्त परमजीतकुमार दहिया, उत्तर भारतीय जनता परिषदेचे महाराष्ट्र अध्यक्ष संजय पांडे, मुंबई भाजपा युवा मोर्चाचे अध्यक्ष तेजिंदर तिवाना यांच्यासह छट पूजा उत्सव समित्यांचे ५५ प्रतिनिधी उपस्थित होते. यावेळी समितीच्या सूचनांचा प्रामुख्याने विचार करण्यात आला.

मुंबईत ४० ते ६० ठिकाणी पूजा

छट पूजेसाठी मुंबई शहर आणि उपनगरातील सुमारे ४० पूजा स्थळे निश्चित केली आहेत. ही संख्या मागणीनुसार ६० पर्यंत वाढवण्यात येणार आहे. तसेच या ठिकाणी पिण्याचे पाणी, प्रकाश झोत, पूजेसाठी टेबल, वाहतूक नियंत्रण, शौचालये आणि महिला भाविकांना पूजेनंतर कपडे बदलण्यासाठी स्वतंत्र खोल्या उभारण्यात येणार आहेत.

मेट्रो, बस रात्री उशीरापर्यंत सुरू राहणार…

या उत्सवासाठी शहरातील मेट्रो आणि बेस्ट बस सेवा रात्री उशिरापर्यंत सुरु राहणार आहे. मेट्रो, बेस्ट बस सेवा रात्री उशिरापर्यंत सुरु ठेवण्यासाठीही मुंबई महापालिकेने पाठपुरावा करावा असेही निर्देश देण्यात आले आहेत. त्याचबरोबर आणखी काही छट पूजा मंडळांना पूजा स्थळांची परवानगी हवी असल्यास तत्काळ एक खिडकी योजना सुरु करून मंडळांना परवानगी द्यावी आणि ही परवानगी गणेशोत्सवाप्रमाणेच पुढील पाच वर्षांसाठी ग्राह्य धरण्यात यावी, अशा सूचना मुंबई भाजपाचे अध्यक्ष अमित साटम यांनी केल्या असून त्यालाही अधिकाऱ्यांनी यावेळी मान्यता दिली.

मुंबई परिसरात रात्री उशिरा छटपूजेकरिता मोठ्या संख्येने भाविक एकत्रित येतात, अशावेळी काही अनुचित प्रकार घडू नये यासाठी आवश्यक पोलीस बंदोबस्त करण्याची मागणी यावेळी छट पूजा समित्यांच्या प्रतिनिधींनी केली. सर्व पूजा स्थळांवर चोख पोलीस बंदोबस्त यासह सुरक्षेकरिता सीसी टीव्ही बसवण्यात येणार असल्याचे अतिरिक्त पोलीस आयुक्त परमजीतकुमार दहिया यांनी सांगितले.