मुंबई : एलएसजीडी आणि एलजीएस हे प्रशासकीय अभ्यासक्रम पूर्ण करणाऱ्या महापालिकेतील लिपिकीय व निरीक्षकीय संवर्गातील कर्मचाऱ्यांची वेतनवाढ बंद करण्यात आल्यामुळे संतप्त झालेल्या कर्मचाऱ्यांनी ८ ऑक्टोबर रोजी महापालिका मुख्यालयावर मोर्चा काढण्याचा निर्णय घेतला होता. मात्र, तांत्रिक अडचणींमुळे पोलिसांनी परवानगी नाकारल्याने मोर्चा पुढे ढकलण्यात आला होता. आता येत्या १६ ऑक्टोबर रोजी हा मोर्चा महापालिका मुख्यालयावर धडकणार आहे.
एलएसजीडी आणि एलजीएस हे प्रशासकीय अभ्यासक्रम यशस्वीरित्या पूर्ण करणाऱ्या मुंबई महापालिकेतील लिपिकीय व निरीक्षकीय संवर्गातील कर्मचारी व अधिकाऱ्यांना १९६७ पासून विशेष वेतनवाढ देण्यात येत होती. ही वेतनवाढ वर्षानुवर्षे त्यांच्या सेवाशर्तीनुसार देण्यात येत होती. महापालिका प्रशासनाने ५ जानेवारी रोजी परिपत्रक काढून संबंधितांची वेतनवाढ बंद करण्याचा निर्णय घेतला. मात्र, हा निर्णय बेकायदेशीर आणि एकतर्फी असल्याचा आरोप द म्युनिसिपल युनियनने केला आहे. या निर्णयामुळे कर्मचाऱ्यांमध्ये संतापाची लाट उसळली असून महापालिका प्रशासनाने हा बेकायदेशीर निर्णय रद्द करावा, तसेच जुनी पेन्शन योजना तात्काळ लागू करावी, या मागणीसाठी ८ ऑक्टोबर रोजी महापालिका मुख्यालयावर मोर्चा काढण्याचा निर्णय कर्मचाऱ्यांनी घेतला होता.
मात्र, ८ ऑक्टोबर रोजीच्या मोर्चाला पोलिसांनी परवानगी नाकारली. हा मोर्चा रद्द होऊ नये, यासाठी द म्युनिसिपल युनियनने ८ ऑक्टोबर रोजी पोलिसांना पत्र पाठवले होते. मात्र, पोलिसांनी परवानगी न दिल्याने १६ ऑक्टोबर रोजी मोर्चा काढण्याचा निर्णय युनियनने घेतला आहे.
पालिका मुख्यालयावर काढण्यात येणाऱ्या मोर्चानंतर महापालिका आयुक्त व प्रशासक भूषण गगराणी यांची भेट घेण्यात येणार आहे. या भेटीत सकारात्मक प्रतिसाद मिळाला नाही, तर आंदोलन तीव्र करण्याचा निर्णय संघटनेने घेतला आहे. महापालिकेत ५ मे २००८ पासून नियुक्त झालेल्या कर्मचाऱ्यांचा जुन्या पेन्शन योजनेचा प्रश्नही प्रलंबित असून त्याचेही निराकरण करण्याची मागणी कर्मचाऱ्यांनी केली आहे. दरम्यानच्या काळात उपदान, जुन्या पेन्शनचा भाग असलेला कुटुंब निवृत्ती वेतन आणि असमर्थता निवृत्ती वेतन लागू करून घेण्यात संघटनेला यश आले होते. मात्र, जुन्या पेन्शन योजनेतील सेवानिवृत्ती वेतनाचा भाग अद्यापही लागू न झाल्याने कामगार, कर्मचाऱ्यांमध्ये नाराजी पसरली आहे.