मुंबई : पर्यावरणपूरक गणेशोत्सवाला चालना मिळावी यासाठी महानगरपालिकेकडून मूर्तिकारांना मोफत शाडू माती, ‘प्रथम येणाऱ्यास प्रथम प्राधान्य’ या तत्वावर मंडपासाठी जागा अशा सुविधा उपलब्ध करून दिल्या आहेत. या सुविधांमध्ये आता पर्यावरणपूरक रंगांचीही भर पडली असून महानगरपालिकेकडून मूर्तिकारांना प्रायोगिक तत्त्वावर पर्यावरणपूरक रंगाचा पुरवठा करण्यात येणार आहे. त्यात एकूण सहा पर्यावरणपूरक रंगांचा समावेश आहे. एकूण ७ हजार ८०० लीटर रंग आणि ३ हजार लीटर इको प्रायमर पुरविण्यात येणार आहे. या रंगांमुळे विसर्जनानंतर होणारे जलप्रदूषण रोखण्यात मदत मिळणार आहे.

गणेशोत्सव साजरा करण्यासाठी महानगरपालिकेकडून मूर्तिकार तसेच गणेश मंडळांना विविध सेवा सुविधा पुरविण्यात येत आहेत. महानगरपालिका आयुक्त तसेच प्रशासक भूषण गगराणी यांच्या आदेशानुसार, तसेच अतिरिक्त महानगरपालिका आयुक्त डॉ. अमित सैनी यांच्या मार्गदर्शनाखाली प्रशासनाकडून निरनिराळ्या नागरी सेवा-सुविधा पुरविल्या जात आहेत. मुंबईत शाडू मातीच्या मूर्ती घडविण्यासाठी प्रोत्साहन मिळावे, जास्तीत जास्त पर्यावरणपूरक मूर्तींची प्रतिष्ठापना व्हावी, यासाठी महानगरपालिकेकडून मूर्तिकारांना दरवर्षीप्रमाणे यंदाही मोफत शाडू माती पुरविण्यात आली आहे. आतापर्यंत मूर्तिकारांना ९५२ टन माती पुरविण्यात आली आहे. यासोबतच ९९७ मूर्तिकारांना मूर्ती घडविण्यासाठी मंडपासाठी जागाही देण्यात आली आहे. मूर्ती रंगविण्यासाठी वापरले जाणारे रंग विशेषतः रासायनिक रंग हे पर्यावरणासाठी घातक ठरू शकतात. त्यामुळे विसर्जनाच्या वेळी जलस्रोतांचे प्रदूषण होऊन सार्वजनिक आरोग्यावर विपरित परिणाम होण्याची दाट शक्यता असते. या शक्यता लक्षात घेऊन महानगरपालिकेने मूर्तिकारांना शक्य तितक्या पर्यावरणपूरक रंगांचा वापर करण्याचे आवाहन केले आहे.

याच अनुषंगाने महानगरपालिका प्रशासनामार्फत आता मूर्तिकारांना मूर्ती रंगविण्यासाठी प्रायोगिक तत्वावर पर्यावरणपूरक रंगही देण्यात येणार आहे. पांढरा, नारंगी, पिवळा, हिरवा, निळा आणि लाल असे सहा पर्यावरणपूरक रंग महानगरपालिकेकडून मूर्तिकारांना पुरविण्यात येणार आहेत. इतर रंगांच्या तुलनेत पांढरा रंग मोठ्या प्रमाणात पुरविण्यात येणार आहे. यासोबतच पर्यावरणपूरक पांढरा प्रायमरही देण्यात येणार आहे. यासाठी मूर्तिकारांनी आपापल्या परिसरातील प्रशासकीय विभाग कार्यालयात संपर्क साधावा, असे आवाहन महानगरपालिका प्रशासनातर्फे उप आयुक्त, तसेच गणेशोत्सवाचे समन्वयक प्रशांत सपकाळे यांनी केले आहे. मूर्तिकारांनी या पर्यावरणपूरक रंगांचा वापर करून पर्यावरणपूरक उत्सवाला हातभार लावावा, असेही आवाहन पालिकेने केले आहे.