मुंबई : दिवाळीतील पाडव्याच्या दिवशी बुधवारी मुंबईत पाच ठिकाणी विविध दुर्घटना घडल्या. या दुर्घटनांमध्ये ८ जण जखमी झाले, तर दोघांचा मृत्यू झाला. गिरगावातील एका इमारतीचा भाग कोसळला. बोरिवली, मालाड आणि भायखळ्यात आग लागली. मालाडमध्ये समुद्र किनाऱ्यावर एक जण वाहून गेला. बोरिवली पश्चिम येथील गोराई परिसरात नालंदा गृहनिर्माण सोसायटीत बुधवारी सकाळी ११.३० च्या सुमारास आग लागली. बैठी चाळीतील गाळ्यामध्ये ही आग लागली होती. या आगीमुळे सजावटीचे साहित्य, लाकडी सामान, कपडे जळून खाक झाले. आग बाजूच्याच एक मजली इमारतीतही पसरली. दुपारी २ च्या सुमारास आग विझवण्यात अग्निशमन दलाला यश आले. या दुर्घटनेत पहिल्या मजल्यावरून दोन पुरुषांना अग्निशमन दलाने सुखरुप बाहेर काढले. तर एक महिला पहिल्या मजल्यावरच्या स्नानगृहात अडकली होती. पूजा विनयचंद्र पारेख (३७) ही महला ५० टक्के भाजली असून रुग्णालयात नेल्यानंतर डॉक्टरांनी तिला मृत घोषित केले.
गिरगावात म्हाडाच्या इमारतीचा भाग पडला
दुसरी दुर्घटना गिरगाव येथील चिराबाजार परिसरात सकाळी ६.१५ च्या सुमारास घडली. जगन्नाथ शंकरशेट मार्गावरील आत्मारामन ही म्हाडाची जुनी इमारत असून या इमारतीच्या पहिल्या मजल्यावरील एका खोलीच्या स्वयंपाकघराचा भाग कोसळला. यामध्ये ठाकरजी गाला (७५) आणि गुणवंती गाला (७१) जखमी झाले. त्यापैकी गुणवंती यांना ग्रॅंटरोड येथील भाटिया रुग्णालयात दाखल करण्यात आले असून त्यांची प्रकृती स्थिर आहे.
मालाडमध्ये सात मजली इमारतीत आग
मालाड पश्चिमेकडील लिंक रोड परिसरात भूमी क्लासिक इमारतीत पहाटे ५ वाजता आग लागली होती. इनॉर्बिट मॉलच्या जवळच असलेल्या या सात मजली इमारतीच्या सहाव्या मजल्यावरील एका बंद घरात ही आग लागली होती. आग पसरत गेली आणि सातव्या मजल्यावरील चारही घरांना आगीचा वेढा पडला. सहाव्या मजल्यावरील बंद घरातील विद्युत यंत्रणा, विद्युत वाहिन्या,घरातील सामान, कपडे, टेबल खुर्च्या, पडदे, वातानुकूलित यंत्र, दरवाजे, खिडक्या आदी आगीत भस्मसात झाले. या दुर्घनटनेत एक चोवीस वर्षांचा तरुण जखमी झाला.
भायखळ्यात इमारतीचा भाग पडला
भायखळा परिसरातील भानुशाला या एक मजली इमारतीचा भाग पडला. दुपारी १२.४५ वाजता ही घटना घडली. या दुर्घटनेत सात जण जखमी झाले. जखमींना पालिकेच्या नायर रुग्णालयात व खासगी भाटीया रुग्णालयात दाखल करण्यात आले आहे. गुलाम रसूल (२४), मोहम्मद सय्यद (५९) यांची प्रकृती स्थिर आहे. तर पाच जणांना उपचार करून घरी पाठवण्यात आले.
आक्सा समुद्र किनाऱ्यावर एक जण वाहून गेला
मालाड पश्चिम येथील आक्सा समुद्रात बुधवारी संध्याकाळी पाचच्या सुमारास पोहायला गेलेल्या चारपैकी एक जण वाहून गेला. जे. जे. नर्सिंग होम, आयएनएस हमला गेट समोरच्या भागात समुद्र किनाऱ्यावर हे चौघे जण पोहायला गेले होते. चार जणांपैकी तिघांना सुखरुप बाहेर काढण्यात आले. तर एकाचा संध्याकाळी उशीरापर्यंत शोध सुरू होता.