नागपूर : प्रत्येक निवडणुकीच्या पूर्वी ईव्हीएमच्या पारदर्शकतेवर विरोधीपक्षाकडून शंका घेतली जाते. मतपत्रिकेवरच मतदान घ्यावे, अशी मागणी केली जाते. सर्वोच्च न्यायालयापर्यंत हे प्रकरण गेले. त्यांनीही ईव्हीएमवरील सर्व शंका फेटाळून लावल्या. त्यानंतर काँग्रेसने ईव्हीएमवर नुसतीच टीका करण्यापेक्षा नेमके हे यंत्र काम कसे करते, त्याला कसे हाताळावे लागते, त्याबाबतची तांत्रिक माहिती कार्यकर्त्यांना देण्यावर भर दिला. नुकत्याच झालेल्या लोकसभा निवडणुकीत पक्षाने हा प्रयोग यशस्वीरित्या केला. त्याचे सकारात्मक परिणाम दिसून आल्यावर आता आगामी विधानसभा निवडणुकीसाठीही कार्यकर्त्यांना प्रशिक्षण देण्याचा निर्णय पक्षातर्फे घेण्यात आला. नागपूर शहर काँग्रेस समितीतर्फे रविवारी काँग्रेसचे पदाधिकारी, कार्यकर्त्यांना ईव्हीएमबाबतची माहिती देण्यात आली. ईव्हीएम नेमके काम कसे करते, त्याकडे कसे लक्ष द्यावे याबाबतची माहिती या क्षेत्रातील तज्ज्ञ ॲड. पवन डहाट यांनी दिली. नुकत्याच झालेल्या लोकसभा निवडणुकीत काँग्रेसने ईव्हीएमबाबत कार्यकर्त्यांना माहिती व त्यासोबतच प्रशिक्षण शिबीर घेतले होते. ईव्हीएमवर लक्ष कसे ठेवायचे याची माहिती कार्यकर्ते व पदाधिकाऱ्यांना दिली होती. यासंदर्भात रविवारी शहर काँग्रेसच्यावतीने आगामी विधानसभा निवडणुकांच्या पार्श्वभूमीवर नागपुरातील सहाही विधानसभा मतदारसंघातील पदाधिकारी, माजी नगरसेवक व इतरही प्रमुख पदाधिकारी व कार्यकर्त्यांसाठी विशेष बैठक बोलवण्यात आली होती. बैठकीच्या अध्यक्षस्थानी आमदार व काँग्रेसचे शहर अध्यक्ष विकास ठाकरे उपस्थित होते.. बैठकीत डहाट यांनी इव्हीएम, बॅलेट युनिट, व्हीव्हीपॅट याबाबतची माहिती दिली. ईव्हीएम हॅंग झाले तर काय करायचे, यंत्र मध्येच बंद पडले तर काय करायचे यावर चर्चा करण्यात आली. यावेळी कार्यकर्त्यांनी विचारलेल्या शंकांचे निरासन करण्यात आले. हेही वाचा : तीन विरुद्ध तीन! मुख्यमंत्री म्हणतात, ‘हा’ मतदारसंघ आम्ही लढूच… ऐरवी काँग्रेसकडून फक्त मतदानाच्या दिवशी केंद्रावर प्रतिनिधींची नियुक्ती केली जात होती. त्यांना मतदान प्रक्रियेची जुजबी माहिती राहात असे. ईव्हीएमबाबत विशेष तांत्रिक माहिती प्रतिनिधींना राहात नव्हती. त्यात कोणी हेरफेर करायचे ठरवले तर आक्षेप घेण्यासाठी काय करायला हवे याची माहिती नसल्याने कोणी आक्षेप घेण्याच्या भानगडीत पडत नव्हते व घेतला तरी तो योग्य स्वरुपात राहात नसल्याने तो फेटाळला जात असे. आता काँग्रेसने ईव्हीएम बाबत इत्यंभूत माहिती कार्यकर्ते, बुथ प्रतिनिधी, मतदान केंद्रावरील प्रतिनिधी यांना देणे सुरू केले आहे. या बैठकीला.आ. अभिजित वंजारी, सोशल मिडिया प्रमुख विशाल मुत्तेमवार, अतुल कोटेचा, प्रा. दिनेश बानामाकोडे, गजरात हटेवार, गिरीश पांडव, बंटी शेळके व अन्य कार्यकर्ते उपस्थित होते.
