गडचिरोली : मागील काही महिन्यांपासून वैद्यकीय महाविद्यालयातील अनियमतता आणि अधिष्ठाता डॉ. अविनाश टेकाडे यांच्यासंदर्भात अनेक आरोप होत आहेत. गुरुवारी पुन्हा एकदा डॉ. टेकाडे यांच्या कारभाराचे जिल्हा शल्य चिकित्सकांनी पत्र लिहून वाभाडे काढले. यात जिल्हा रुग्णालयात नियुक्त केलेल्या २९ चिकित्सालयीन प्राध्यापक रुग्णसेवेत कुचराई करत आहेत, त्यामुळे रुग्णसेवा प्रभावित होत असल्याचा दावा जिल्हा शल्यचिकित्सकांनी केला आहे.

यावरुन जिल्हा शल्यचिकित्सक व शासकीय वैद्यकीय महाविद्यालयाचे अधिष्ठाता यांच्यात जुंपली असून रुग्णसेवेला सर्वोच्च प्राधान्य हवे, अन्यथा परिणाम गंभीर असतील, अशा शब्दांत जिल्हा शल्यचिकित्सक डॉ. माधुरी किलनाके यांनी अधिष्ठाता डॉ. अविनाश टेकाडे यांना सुनावले आहे.

चालू शैक्षणिक वर्षापासून जिल्ह्यात शासकीय वैद्यकीय महाविद्यालय सुरु झाले आहे. सुरुवातीला तीन विद्यार्थ्यांचा वैनगंगा नदीपात्रात बुडून मृत्यू, बांधकामावर केलेली उधळपट्टी, त्यानंतर जागेचा वाद यामुळे हे महाविद्यालय सातत्याने चर्चेत आहे. जिल्हाधिकारी अविश्यांत पंडा यांनी महिनाभरापूर्वी शासकीय वैद्यकीय महाविद्यालयाला भेट देऊन बांधकामाची चौकशी करण्याचे निर्देश दिले, त्यानंतर आम आदमी पार्टी व वंचित बहुजन आघाडीने अधिष्ठाता हटावची मागणी केली केली होती.

हेही वाचा

आता खुद्द जिल्हा शल्यचिकित्सक डॉ. माधुरी किलनाके यांनी अधिष्ठाता डॉ. अविनाश टेकाडे यांच्या भूमिकेवर आक्षेप घेत कडक शब्दांत खडेबोल सुनावले आहेत. दोन पालकमंत्री असलेल्या गडचिरोलीत प्रशासकीय अधिकाऱ्यांत रंगलेल्या लेटरवॉरची चर्चा आहे. प्रशासनावर अंकुश कोणाचा, असा प्रश्न उपस्थित होत आहे.

गैरजबाबदार वागणूक

शासकीय वैद्यकीय महाविद्यालयांतील २९ चिकित्सालयीन प्राध्यापकांना वैद्यकीय सेवेसाठी ४ ऑगस्ट रोजी जिल्हा रुग्णालयात पाठविण्यात आले. मात्र, ते सेवाच देत नाही, त्यामुळे जिल्हा रुग्णालयाचे कामकाज प्रभावित होत असल्याचे अतिरिक्त जिल्हा शल्यचिकित्सकांनी अधिष्ठातांना लेखी पत्र पाठवून कळविले होते. त्यावर अधिष्ठातांनी आक्षेप घेतला होता.

हेही वाचा

यानंतर जिल्हा शल्यचिकित्स डॉ. माधुरी किलनाके यांनी अधिष्ठाता डॉ. अविनाश टेकाडे यांना २४ सप्टेंबर रोजी पत्र लिहून पत्रावर कोणाची स्वाक्षरी आहे, यावर आक्षेप घेणे व्यर्थ असल्याचे नमूद केले आहे. ही गैरजबाबदार अणि वेळखाऊ वागणूक आहे.

प्राध्यापक अद्यापही सेवा देत नाही ही मूळ समस्या आहे, असल्याच्या मुद्द्याकडेही त्यांनी लक्ष वेधले. जिल्हा रुग्णालयात नियुक्त प्राध्यापकांनी नियमित हजर राहून सेवा द्यावी, पत्रावर स्वाक्षरी किंवा पदनामावर वाद घालणे थांबवा, असे डॉ. किलनाके यांनी म्हटले आहे.

शासकीय वैद्यकीय महाविद्यालयात प्राध्यापकांची बहुतांश पदे रिक्त आहेत. औषधी, अस्थिरोग आदी विभागांत प्राध्यापक सेवा देतच आहेत. सेवा देण्यास कोण टाळाटाळ करतयं याची त्यांनी यादी द्यावी, त्यांच्यावर योग्य ती कारवाई केली जाईल. – डॉ. अविनाश टेकाडे, अधिष्ठाता, शासकीय वैद्यकीय महाविद्यालय.