गडचिरोली : खून, चकमक, जाळपोळ अशा गंभीर गुन्ह्यांत आरोपी असलेल्या जहाल नक्षलवाद्याला गडचिरोली पोलिसांच्या विशेष पथकाने तेलंगणातील हैदराबाद शहरातून अटक केली. शंकर ऊर्फ अरुण येर्रा मिच्चा (२५ रा. बांदेपारा, ता. भोपालपट्टनम, जि. बीजापूर, छत्तीसगड) असे अटक करण्यात आलेल्या जहाल नक्षलवाद्याचे नाव असून तो भूमिगत होण्यापूर्वी पेरमीली दलमचा सक्रिय सदस्य होता. त्याच्यावर दोन लाखांचे बक्षीस होते.

छत्तीसगडचा रहिवासी असलेला शंकर उर्फ अरुण २०१८ साली मद्देड दलममध्ये भरती झाला होता. २०२२ नंतर तो गडचिरोली जिल्ह्यात सक्रिय झाला. २०२४ पर्यंत तो पेरमीली दलमध्ये कार्यरत होता. २०२३ रोजी कापेवंचा येथे रामजी आत्राम यांची त्याने हत्या केली. दरम्यानच्या काळात गडचिरोली पोलिसांनी नक्षलविरोधी मोहीम अधिक तीव्र केल्याने घाबरलेल्या शंकरने भूमिगत राहून काही काळ शेती केली व त्यानंतर तो तेलंगणातील हैदराबाद येथे कामगार म्हणून राहू लागला.

यासंदर्भात मिळालेल्या गोपनीय माहितीवरून पोलीस अधीक्षक निलोत्पल यांच्या मार्गदर्शनात ‘सी-६०’ पथकाच्या जवानांनी सापळा रचून ४ सप्टेंबरला हैदराबाद येथून शंकरला ताब्यात घेतले. यावेळी चौकशीदरम्यान त्याने हत्येची कबुली दिली. यावरून पोलिसांनी विविध कलमान्वये गुन्हा दाखल करीत त्याला न्यायालयात हजर केले. न्यायालयाने त्याला चार दिवसांची पोलीस कोठडी सुनावली.

हेही वाचा

चकमक आणि खुनात सहभाग

२०२० – मौजा येडदर्मी जंगल परिसरात पोलिसांसोबत झालेल्या चकमकीत सहभाग.

२०२१ – मौजा मडवेली जंगल परिसरात झालेल्या चकमकीत सहभाग.

२०२३ – मौजा वेडमपल्ली जंगल परिसरात झालेल्या चकमकीत सहभाग.

२०२३ (नोव्हेंबर) – मौजा कापेवंचा येथे एका निरपराध आदिवासी नागरिकाच्या हत्येत सहभाग.

२०२४ – मौजा चितवेली जंगल परिसरात झालेल्या चकमकीत सहभाग.