नागपूर : भाजप नेत्या आणि अमरावतीच्या माजी खासदार नवनीत राणा यांना नागपुरातील एका खासगी रुग्णालयात दाखल करण्यात आले आहे. त्यांच्यावर शस्त्रक्रिया करण्यात आली असून डॉक्टरांनी त्यांना काय सल्ला दिला, याबाबत जाणून घेऊ या…
भाजप नेत्या आणि अमरावतीच्या माजी खासदार नवनीत राणा यांना पायाला झालेल्या गाठीमुळे नागपूरमधील नरेंद्रनगर येथील सुयोग हॉस्पिटलमध्ये दाखल करण्यात आले आहे. लोकसभा निवडणुकीदरम्यान झालेल्या जुन्या इजेचा त्रास पुन्हा उद्भवल्याने त्यांना उपचारासाठी तातडीने येथे दाखल करण्यात आले. नागपुरातील सुप्रसिद्ध अस्थीरोग शल्यचिकित्सक डॉ. गिरीश मोटवानी यांच्या देखरेखीखाली त्यांच्यावर शस्त्रक्रिया करण्यात आली आहे. नवनीत राणा सध्या त्यांच्या रुग्णापायात उपचार घेत आहेत. पुढील २५ दिवस पूर्णत: बेडरेस्ट करण्याचा सल्ला डॉक्टरांनी त्यांना दिला आहे.
नवनीत राणा यांच्या पायाला झालेली दुखापत ही लोकसभा निवडणुकीच्या प्रचार काळात झालेल्या फ्रॅक्चरशी संबंधित असल्याचे वैद्यकीय सूत्रांनी सांगितले आहे. निवडणुकीच्या काळात सतत प्रवास, सभा आणि जनसंपर्क मोहिमेमुळे ती इजा पूर्णत: बरी झाली नव्हती. आता त्याच ठिकाणी सूज आणि गाठ तयार झाली आहे. अमरावती येथील नामांकित ऑर्थोपेडिक तज्ज्ञ डॉ. शाम राठी यांच्या सल्ल्यानुसार नवनीत राणा यांना नागपूरमधील सुयोग हॉस्पिटलमध्ये दाखल करण्यात आले आहे.
रुग्णालय प्रशासनाचे म्हणणे काय ?
रुग्णालयातील सूत्रांच्या माहितीनुसार, माजी खासदार नवनीत राणा यांची प्रकृती सध्या स्थिर आहे. डॉक्टरांच्या सांगण्यानुसार त्यांना काही काळ शारीरिक हालचाल टाळावी लागेल आणि आवश्यक ते उपचार पूर्ण केल्यानंतरच त्या पुन्हा राजकीय कार्यात सहभागी होऊ शकतील. त्यांचे पती आमदार रवी राणा हे सतत रुग्णालयात त्यांच्या सोबत उपस्थित आहेत.
रुग्णालयाबाहेर मोठा पोलीस बंदोबस्त
माजी खासदार नवनीत राणा यांना काही दिवसांपूर्वी धमक्या मिळाल्याचा मुद्दा चर्चेत आला होता. त्यामुळे त्यांच्या सुरक्षेची जबाबदारी पोलिसांकडे सोपवण्यात आली आहे. रुग्णालय परिसरात पोलिसांचा मोठा बंदोबस्त ठेवण्यात आला असून केवळ त्यांच्या जवळच्या व्यक्तींनाच भेटण्याची परवानगी दिली जात आहे. पोलिसांकडून सर्वोतोपरी काळजी घेतली जात आहे. कारण नवनीत राणा यांना गेल्या काही दिवसांत दोनवेळा धमक्या देण्यात आल्या आहेत. सध्या त्यांच्या प्रकृतीत सुधारणा होत असून डॉक्टरांनी योग्य उपचार आणि पूर्ण विश्रांती घेतल्यास त्या लवकरच पुन्हा तंदुरुस्त होतील, अशी अपेक्षा व्यक्त केली आहे.