“जावयाचं कर्ज नको, हे घ्या जेवणाचे पैसे,” महसूलमंत्री चंद्रशेखर बावनकुळे असे का म्हणाले?

अर्ध्या तासात बावनकुळे यांचा ताफा करुणाश्रम  येथील इको पार्कमध्ये पोहचला. सोबत माजी खासदार रामदास तडस, भाजप जिल्हाध्यक्ष सुनील गफाट व अन्य मंडळी होती. जेवणाचे टेबल लावून तयार होते. साधे जेवण सूचना असल्याने भरीत, भाकर, मेथीची भाजी व टमाटर चटणी असा बेत. समरसून सर्व जेवले. मग पैसे द्यायची वेळ आली, तेव्हा तडस व अन्य पुढे आले. तेव्हा कुणीही नका देवू, मीच देतो असे बावनकुळे निक्षुन म्हणाले. मी पोरीकडचा, जावयाचे कर्ज नको रे बाबा असे म्हणत खिश्यातून पैसे काढत टेबलवर ठेवले. हे नाते कसे ?  तर इको पार्कचे संचालक आशिष गोस्वामी यांच्या पत्नी कोराडीच्या व बावनकुळे हे पण कोराडीचे. असे हे नाते. जेवत असतांना गोस्वामी यांनी कुटुंबाचा परिचय करून दिला होता. तो धागा स्मरून बावनकुळे यांनी हजारजबाबी  उत्तर दिले. मात्र या उत्तराने चांगलाच हास्यकल्लोळ उडाला. बावनकुळे यांच्या सोबत ५० लोकांचा ताफा होता. त्यांना जे असेल ते खाऊ घाला. उपाशी ठेवू नका, असे सांगायला ते विसरले नाही.

सर्वांचे जेवण आटोपल्यावर व पैसे देऊन झाल्यावर बावनकुळे यांचा ताफा समृद्धी मार्गावर वळला. तेथून नागपूर एअर पोर्ट व मग थेट पूणे. इको पार्क ईथे बावनकुळे यांचा थोडा आठवणीचा ठेवा आहे. ते पूर्वी वर्धा जिल्ह्याचे पालकमंत्री  होते. त्यावेळी तत्कालीन जिल्हाधिकारी विवेक भिमनवर  हे जिल्हाधिकारी होते. त्यांना इको पार्कला  शासकीय दर्जा देण्याचा प्रस्ताव ठेवला. तेव्हा पालकमंत्री असलेल्या बावनकुळे यांनी या पर्यावरण पूरक उपक्रमाचे स्वागत करीत प्रस्ताव त्वरित मंजूर केल्याची बाब गोस्वामी यांनी सांगितली.