नाशिक – पंतप्रधान नरेंद्र मोदी यांनी नाशिक येथे राष्ट्रीय युवक महोत्सवात २२ जानेवारीपर्यंत मंदिरांची स्वच्छता करण्याच्या आवाहनानुसार जिल्ह्याच्या ग्रामीण भागातीत प्रमुख मंदिरांची स्वच्छता करण्यात येत आहे. जिल्हा परिषद आणि नाशिक पंचायत समितीच्या संयुक्त विद्यमाने नाशिक तालुक्यातील ओढा येथे मंदिरांची स्वच्छता करण्यात आली.
जिल्हा परिषदेच्या मुख्य कार्यकारी अधिकारी आशिमा मित्तल यांच्या मार्गदर्शनाखाली ग्रामीण भागात मंदिरांमध्ये स्वच्छता अभियान राबवण्यात येत आहे. मंदिराची साफसफाई करणे, मंदिर परिसराची स्वच्छता करणे, प्रमुख मंदिरांमध्ये रोषणाई करणे, या बाबींचा अभियानात समावेश आहे. या अभियानात सर्व लोकप्रतिनिधी, राजकीय पक्षांचे पदाधिकारी, जिल्हा आणि तालुका स्तरावरील अधिकारी, मंदिर विश्वस्त, भजनी मंडळे, सामाजिक संस्था, बचत गट, महिला मंडळे, यांना सहभागी करुन घेण्याचे निर्देश देण्यात आले आहेत. या अभियानाबाबतच्या सूचना सर्व गटविकास अधिकाऱ्यांना देण्यात आल्या आहेत.
हेही वाचा >>>नाशिक : रस्त्यांच्या कामामुळे पंचवटीत दोन मार्गावर वाहतूक निर्बंध
नाशिक तालुक्यातील ओढा येथे पाणी व स्वच्छता विभागाचे उपमुख्य कार्यकारी अधिकारी दीपक पाटील यांच्या उपस्थितीत स्वच्छता मोहीम राबवण्यात आली. यावेळी गावातील महादेव, लक्ष्मी नारायण, गणपती या मंदिरांच्या परिसराची स्वच्छता करण्यात आली. तसेच स्वच्छतेची शपथ घेण्यात आली.
जिल्ह्यात १७ आणि १८ जानेवारी रोजी मंदिरांमध्ये स्वच्छता मोहीम राबवण्यात येणार असून २२ जानेवारीपर्यत प्रमुख मंदिरांवर रोषणाई करण्याचे निर्देश देण्यात आल्याची माहिती मित्तल यांनी दिली. ओढा येथे आयोजित मंदिर स्वच्छता अभियानात सरपंच प्रिया पेखळे, उपसरपंच योगेश कापसे, विस्तार अधिकारी श्रीधर सानप, ग्रामपंचायत सदस्य बबन कंक आदी उपस्थित होते.