जळगाव जिल्ह्यात पहिल्यांदाच लेप्टोस्पायरोसिसचा रुग्ण

दरम्यान, रुग्णाच्या कुटुंबातील इतर सदस्यांमध्ये कोणतीही लक्षणे आढळून आली नसली, तरी पुढील १४ दिवस डांगरी गावात सर्वेक्षण करण्यात येणार आहे. करोनासारख्या महामारीतून सावरत आहे. आता जनजीवन पूर्वपदावर आले आहे. पुन्हा नवनवीन आजारांनी डोके वर काढले असल्याचे जिल्ह्यात आढळून आलेल्या लेप्टोस्पायरोसिस आजाराच्या रुग्णावरून निष्पन्न झाले आहे. मात्र, जिल्हा परिषदेच्या आरोग्य यंत्रणेकडून पूर्णपणे काळजी व दक्षता घेतली जात आहे. जिल्ह्यात पहिल्यांदाच लेप्टोस्पायरोसिस आजाराचा रुग्ण आढळून आला आहे. अमळनेर तालुक्यातील डांगरी येथील चार वर्षांच्या बालकाला या आजाराची लागण झाली आहे. जिल्हा परिषदेचे जिल्हा आरोग्य अधिकारी डॉ. सचिन बहेकर, जिल्हा साथरोग अधिकारी प्रमोद पांढरे, डॉ. वाभळे, हिवताप नियंत्रण विभागाचे आरोग्य सहाय्यक विपुल लोणारी, धनराज सपकाळे, तालुका वैद्यकीय अधिकारी डॉ. गिरीश गोसावी, डॉ. रनाळकर यांच्यासह आरोग्यसेवक, आरोग्यसेविकांच्या पथकाने डांगरी येथे भेट देत पाहणी केली. गावात पथक ठाण मांडून असून, रोज गावात पाहणी करीत ग्रामस्थांची तपासणी करण्यात येणार आहे. तसेच आरोग्यसेवक, आरोग्यसेविकांमार्फत सर्वेक्षणही करण्यात येणार असल्याचे डॉ. बहेकर यांनी सांगितले.

हेही वाचा – सिडकोत पुन्हा एकदा दिवसाढवळ्या युवकाची हत्या

हेही वाचा – कांदा तिढा कायम; बाजार समित्यांमध्ये ‘नाफेड’ची खरेदीच नाही

डॉ. बहेकर यांनी सांगितले की, संबंधित कुटुंब परजिल्ह्यात गेले होते. परत आल्यानंतर बालक आजारी पडल्याने त्याला धुळे येथील रुग्णालयात दाखल करण्यात आले होते. तेथे लेप्टोरोयसिस आजाराचे निदान झाले. उपचार करून बालक व कुटुंबीय डांगरी येथे त्यांच्या घरी आले आहे. पथकाने त्यांची भेट घेत तपासणीही केली. आता बालकाची प्रकृती स्थिर असून, कुटुंबातील कोणालाही लक्षणे आढळून आली नाहीत. मात्र, दक्षता म्हणून आणखी तपासणी करण्यात येणार आहे. रोगबाधित प्राण्यांच्या लघुशंकेतून लेप्टोस्पायरोसिस आजार फैलावतो. त्यात तीव्र ताप, अंगदुखी, डोळे लालसर होणे, तीव्र डोकेदुखी, अशी लक्षणे दिसून येतात. प्रामुख्याने मुंबईसह ठाणे, रत्नागिरी, रायगड, पालघर या भागांत, तसेच भात व ऊस लागवडीच्या क्षेत्रात या आजाराचे रुग्ण आढळून येतात. आजारावर लवकर उपचार न झाल्यास छातीत पाणी जाऊन रुग्णांची प्रकृती गंभीर होते.