नाशिक : जिल्हा परिषदेच्या वतीने कुपोषण निर्मूलनार्थ पोषणदूत हा महत्त्वाकांक्षी उपक्रम राबविण्यात येत आहे. या उपक्रमांतर्गत जिल्हा परिषदेतील सर्व अधिकारी एकेका कुपोषित बालकाची जबाबदारी स्वीकारुन पोषणदूत होणार आहेत.
जिल्हा परिषदेचे मुख्य कार्यकारी अधिकारी ओमकार पवार यांनी स्वतः ‘पोषण दूत’ होऊन दीपक पिंपळके या वैष्णवनगर येथील कुपोषित बालकाचे आरोग्य सुधारण्याची जबाबदारी स्वीकारली आहे. दीपक हा पाच वर्षांचा असून त्याचे वजन ११ किलो, उंची ९३ सेंमी आहे. त्याला सॅम श्रेणीतील (अतितीव्र कुपोषित) म्हणून वर्गीकृत करण्यात आले आहे. अशा बालकांना योग्य आहार, वैद्यकीय सल्ला व कुटुंबास मार्गदर्शन करून आरोग्य सुधारले जाऊ शकते, यासाठी ‘पोषण दूत’ म्हणून मुख्य कार्यकारी अधिकारी थेट कुटुंबाशी संपर्क साधणार आहेत. कुपोषण निर्मूलन ही केवळ एका विभागाची जबाबदारी नसून प्रशासनातील प्रत्येक अधिकाऱ्याची सामाजिक जबाबदारी असल्याचे पवार यांनी सांगितले. एक अधिकारी एक बालक अशा पद्धतीने आपण पुढाकार घेतल्यास नाशिक जिल्हा कुपोषणमुक्त करण्यास मदत होईल, असा आशावाद त्यांनी व्यक्त केला.
पोषणदूत उपक्रमातंर्गत प्रत्येक अधिकारी आपल्या कार्यक्षेत्रातील एका कुपोषित बालकाला दत्तक घेतो. संबंधित बालकाच्या कुटुंबाशी नियमित संवाद साधून आहार पद्धती, स्वच्छता, आरोग्य तपासणी आणि पूरक आहार याबाबत लक्ष ठेवले जाणार आहे. अंगणवाडी सेविका, आशा आणि आरोग्य सेविका यांच्याशी समन्वय साधून बालकाचे नियमित वजन व उंची तपासली जाईल, यामुळे कुपोषित बालकांच्या प्रगतीवर थेट लक्ष ठेवले जाणार आहे.
मुख्य कार्यकारी अधिकारी पवार यांनी सर्व विभागप्रमुख, प्रकल्प अधिकारी, गटविकास अधिकारी आणि इतर अधिकाऱ्यांनीही कुपोषित बालकांचे ‘पोषणदूत’ बनावे, अशा सूचना दिल्या आहेत. त्यामुळे प्रत्येक कुपोषित बालकाच्या आरोग्याची सामूहिक जबाबदारी प्रशासनाकडून घेतली जाणार आहे, यावेळी गटविकास अधिकारी डॉ. सोनिया नाकाडे, सरपंच मंगळु पिंपळके, ग्रामपंचायत अधिकारी विश्वनाथ तरवारे यांच्यासह तालुकास्तरीय अधिकारी व कर्मचारी उपस्थित होते.
नाशिक जिल्हा परिसरात आदिवासी बहुल असलेल्या पेठ, सुरगाणा, त्र्यंबकेश्वर, इगतपुरी, दिंडोरी परिसरात कुपोषित बालकांचे प्रमाण अधिक आहे. वेगवेगळ्या सामाजिक संस्था, अंगणवाडी सेविका व आरोग्य विभागाच्या मदतीने या ठिकाणी कुपोषण नियंत्रणात आणण्यासाठी वेगवेगळ्या संकल्पनांवर काम सुरू आहे. गरोदर मातांना अमृत आहार, स्तनदा मातांना घरातच पौष्टिक अन्न कसे मिळेल, नाचणी सह अन्य काही भरड धान्यातून कुपोषित बालकांसाठी पोषक पाककृती याची माहिती दिली जात आहे. या सगळ्या पार्श्वभूमीवर पोषणदूत उपक्रम कुपोषण नियंत्रणात आणण्यासाठी महत्वपूर्ण भूमिका निभावेल असा विश्वास व्यक्त करण्यात येत आहे.