नवी मुंबई : नवी मुंबई पोलीस आयुक्तालयातील सानपाडा या पोलीस ठाण्याच्या इमारतीचे उद्घाटन मुख्यमंत्री देवेंद्र फडणवीस यांच्या हस्ते आज पार पडले. अनेक वर्षांपासून या इमारतीची प्रतीक्षा केली जात होती. जीर्ण आणि कोंदट अशा तीन खोल्यातून सानपाडा विभागाचा कायदा सुव्यवस्थेचा गाडा हाकण्यात येत होता मात्र आज पासून नवीन वास्तू मधून कामकाज पहिले जाणार आहे.
अनेक वर्षांपासून प्रतीक्षा असलेल्या सानपाडा पोलीस ठाण्याच्या इमारतीचे उद्घाटन मुख्यमंत्री देवेंद्र फडणवीस यांच्या हस्ते पार पाडले. यावेळी वन मंत्री गणेश नाईक, स्थानिक आमदार मंदा म्हात्रे, सह अनेक राजकीय नेते तसेच पोलीस महासंचालक रश्मी शुक्ला आयुक्त मिलिंद भारंभे सह अनेक वरिष्ठ पोलीस अधिकारी उपस्थित होते.
सानपाडा पोलीस ठाण्यातील इमारत हि केवळ नवी मुंबईतील नव्हे तर राज्यातील सर्वात सुसज्ज पोलीस ठाणे असल्याचा दावा नवी मुंबई पोलिसांनी केला आहे. या वेळी सानपाडा पोलीस ठाणे नवीन ईमारत उद्घाटन, नवी मुंबई पोलीस आयुक्तालय क्षेत्रातील वाशी, पनवेल आणि सीबीडी पोलीस ठाण्यातील वरिष्ठ पोलीस निरीक्षकांना आयएसओ मानांकन प्रमाणपत्र वाटप केले गेले. या शिवाय ई-संवाद ऑनलाईन सेवा, सायबर/ आर्थिक गुन्हे (Cy-Fi) तपास कक्षाचे औपचारिक उद्घाटन करण्यात आले. मुख्यमंत्री देवेंद्र फडणवीस यांनी पूर्ण पोलीस ठाण्याची पाहणी करून माहिती उपस्थित अधिकाऱ्याकडून घेतली.
महाराष्ठ्र हौसिंग कार्पोरेशन यांनी हि इमारत बांधली आहे. या ठिकाणी पोलिसांना लागणाऱ्या सर्व सुविधा देण्यात आल्या आहेत. या ठिकाणी सायबर गुन्हे संदर्भात अधिक वेगवान तपास होण्यातही स्वतंत्र कक्ष उभे करण्यात आले आहे. मुंख्यमंत्री यांनी आखलेल्या १०० दिवसांचा कार्यक्रमात तीन पोलीस ठाणे यांनी बाजी मारली आहे. यात स्वच्छता तक्रारदारांना सेवा असे अनेक मुद्दे आहेत. त्यासाठी आयएसओ मानांकन देण्यात आले आहे. अशी माहिती पोलीस आयुक्त मिलिंद भारंबे यांनी दिली आहे.
नवी मुंबई पोलीस आयुक्तालय क्षेत्रात असणाऱ्या विस्तीर्ण खाडी किनाऱ्याचा मोठा भाग सानपाडा पोलीस ठाणे अंतर्गत येतो. सिडकोने सानपाडा पामबीच येथील मोराज सर्कल समोर सानपाडा पोलीस स्टेशनसाठी सुमारे १८ हजार स्क्वेअर फूट क्षेत्रफळ असलेल्या या ठाण्याचे वैशिष्ट्य म्हणजे हे नवी मुंबईतील पहिले सौरऊर्जेवर चालणारे पोलीस ठाणे येत्या काळात ठरणार आहे. याचे बहुतांश काम पूर्णत्वास येत आहे.
चार मजली या इमारतीत ४० हून अधिक खोल्या असून सुरक्षिततेसाठी खास लॉकरसुविधा उपलब्ध करून देण्यात आली आहे. स्वागत कक्ष, कर्मचारी विश्रांती गृह, स्तनदा मातांसाठी स्वतंत्र कक्ष, लॉकअप रूम, सुसज्ज पार्किंग,कोठडी, बैठक शिवाय सायबर आर्थिक गुन्हे विभाग तसेच सर्व अधिकाऱ्यांसाठी स्वतंत्र दालने असून तक्रारदार आणि भेट घेणाऱ्यांसाठी बैठक व्यवस्था करण्यात आलेली आहे.
सुमारे १० कोटी रुपयांचा खर्च सानपाडा पोलीस ठाण्याच्या नूतन इमारतीचे बांधकाम पूर्ण करण्यासाठी करण्यात आलेला आहे. या इमारतीमुळे आता सानपाडा पोलीस आणि रहिवाशांचीही सोय झाली शिवाय नवी मुंबई शहराची शान वाढवणारी अजून एक दिमाखदार वास्तू उभी राहिली.