Photo : पंतप्रधान नरेंद्र मोदी यांचा उत्तराधिकारी कोण? स्वत:च केलं जाहीर; म्हणाले…

देशात लोकसभा निवडणुकीच्या प्रचाराची धामधूम सुरु असल्यामुळे पंतप्रधान नरेंद्र मोदी यांच्या देशात विविध ठिकाणी जाहीर सभा पार पडत आहेत. पंतप्रधान नरेंद्र मोदी यांनी मंगळवारी बिहारमधील महाराजगंज येथील एका सभेला संबोधित केलं. यावेळी मोदींनी राजकीय वारसाबद्दल मोठं विधान केलं. दिल्लीचे मुख्यमंत्री अरविंद केजरीवाल यांनी एका पत्रकार परिषदेत बोलताना पंतप्रधान नरेंद्र मोदी यांच्याबाबत मोठी भविष्यवाणी केली होती. मुख्यमंत्री अरविंद केजरीवाल यांनी केलेल्या या विधानानंतर पंतप्रधान नरेंद्र मोदी यांचा राजकीय उत्तराधिकारी कोण? असा प्रश्न राजकीय वर्तुळात विचारला जाऊ लागला. या सर्व चर्चेनंतर अखेर पंतप्रधान नरेंद्र मोदी यांनी बिहारमधील महाराजगंज येथील प्रचाराच्या सभेत या संदर्भात मोठं भाष्य केलं. "माझा उत्तराधिकारी कोणीही नाही, या देशातील जनताच माझी उत्तराधिकारी आहे", असं पंतप्रधान नरेंद्र मोदी यांनी म्हटलं. पंतप्रधान नरेंद्र मोदी यांनी आपल्या राजकीय वारसासंदर्भात स्पष्टीकरण दिले. त्यामुळे विरोधकांनी सुरु केलेल्या या चर्चांवर आता पडदा पडला आहे. दरम्यान, पंतप्रधान नरेंद्र मोदी यांनी बिहारमधील महाराजगंज येथील प्रचाराच्या सभेत काँग्रेससह इंडिया आघाडीवर जोरदार हल्लाबोल केला. याबरोबरच ४ जून रोजी लोकसभा निवडणुकीचे निकाल जाहीर झाल्यावर इंडिया आघाडीला मोठा धक्का बसेल, अशा शब्दात पंतप्रधान मोदींनी हल्लाबोल केला. (सर्व फोटो-पंतप्रधान नरेंद्र मोदी फेसबुक पेजवरून साभार)