Photos: सारा तेंडुलकर बॉलिवूड पदार्पणासाठी सज्ज? आघाडीच्या अभिनेत्रींनाही लाजवेलं असं आहे सौंदर्य

मागच्या काही काळापासून सेलिब्रेटी किड्सच्या बॉलिवूड पदार्पणाबद्दल जोरदार चर्चा सुरू आहेत. आगामी काळात बरेच सेलिब्रेटी किड्स बॉलिवूडमध्ये पदार्पण करणार आहेत. या यादीत आता प्रसिद्ध भारतीय क्रिकेटर सचिन तेंडुलकरची मुलगी सारा तेंडुलकरच्या नावाचाही समावेश झाला आहे. साराचे चाहते तिच्या बॉलिवूड पदार्पणाची आतुरतेनं वाट पाहत आहेत. चित्रपटामध्ये विशेष रुची असलेली सारा लवकरच बॉलिवूड पदार्पण करू शकते असा अंदाज आता एका बॉलिवूड रिपोर्टनं वर्तवला आहे. बॉलिवूड लाइफनं दिलेल्या वृत्तानुसार, जवळच्या सूत्रांनी सारा आगामी काळात बॉलिवूड पदार्पण करणार असल्याची माहिती दिली आहे. सूत्रांनी दिलेल्या माहितीनुसार, 'सारा तेंडुलकरला अभिनय क्षेत्रात बरीच रुची आहे. एवढंच नाही तर तिनं अभिनयाचं प्रशिक्षणही घेतलं आहे.' सारा काही नामांकित ब्रँडच्या जाहिराती देखील करते. सारा सध्या लंडन युनिव्हर्सिटीमध्ये वैद्यकशास्त्राचा अभ्यास करत आहे. मात्र २४ वर्षीय साराला ग्लॅमर इंडस्ट्रीमध्ये आपलं करिअर करायचं आहे. सूत्रांच्या माहितीनुसार, 'साराच्या अभिनयाबाबत फारसं कोणाला माहीत नाही कारण याआधी कोणी तिला अभिनय करताना पाहिलेलं नाही. त्यामुळे तिला अभिनय करताना पाहून अनेकांना धक्का बसू शकतो. सारा तेंडुलकर खूपच टॅलेंटेड आहे आणि तिला तिच्या पालकांचा पूर्ण पाठिंबा आहे.सारा एक प्रोफेशनल मॉडेल असून तिचे फोटो सोशल मीडियावर बरेच चर्चेतही असतात. सोशल मीडियावर नेहमीच सक्रिय असणाऱ्या साराचे इन्स्टाग्रामवर १८ लाखांपेक्षा जास्त फॉलोअर्स आहेत. दरम्यान काही वर्षांपूर्वी सारा तेंडुलकर शाहिद कपूरसोबत बॉलिवूड पदार्पण करणार असल्याच्या चर्चा होत्या. मात्र त्यावेळी सचिन तेंडुलकरनं स्वतःच या चर्चांना पूर्णविराम दिला होता. त्यावेळी सचिन म्हणाला होता, "सारा सध्या तिचं शिक्षण घेत आहे आणि आयुष्य एन्जॉय करत आहे. सध्या तरी तिचा बॉलिवूड पदार्पणाचा कोणताही विचार नाही." आता तिच्या बॉलिवूड पदार्पणाच्या चर्चांना उधाण आलं आहे. मात्र याची पुष्टी स्वतः सारानं अद्याप केलेली नाही.