Birthday Special : स्टार किड असूनही बॉलिवूड करिअर ठरलं फ्लॉप; वेटरची नोकरी केलेल्या सोनमला व्हायचं नव्हतं अभिनेत्री

बॉलिवूड अभिनेत्री सोनम कपूरचा आज वाढदिवस. सोनम आई होणार असल्यामुळे हा वाढदिवस तिच्यासाठी खास असणार आहे. सोनम सोशल मीडियावर सक्रिय असून बेबी बंप फ्लॉन्ट करतानाचे अनेक फोटो शेअर करत असते. कपूर घराण्यात जन्मलेल्या सोनमला कलाविश्वात मात्र फारसं यश मिळवता आलं नाही. स्टार किड असूनही सोनमचं बॉलिवूड करिअर फ्लॉप ठरलं. बॉलिवूड दिग्दर्शक संजय लीला भन्साळीच्या 'सांवरिया' चित्रपटातून २००७ साली सोनमने बॉलिवूडमध्ये पदार्पण केलं. या चित्रपटासाठी सोनमने दोन वर्षात तब्बल ३५ किलो वजन कमी केलं होतं. परंतु, तिचा पहिलाच चित्रपट फ्लॉप ठरला. यानंतर सोनम 'भाग मिल्खा भाग', 'नीरजा', 'पॅडमॅन', 'वीरे दी वेडिंग', 'संजू', 'रांझणा' या चित्रपटांतही झळकली. सोनमने जवळपास २० चित्रपटांत काम केलं आहे. परंतु, यातील फक्त ५-६ चित्रपटच हिट ठरले आहेत. सोनमला कधीच अभिनेत्री व्हायचं नव्हतं. तिला चित्रपट दिग्दर्शक व्हायचं होतं. याबद्दल मार्गदर्शन घेण्यासाठी सोनमचे वडील आणि सुप्रसिद्ध अभिनेते अनिल कपूर यांनी तिला संजय लीला भन्साळीकडे जाण्याचा सल्ला दिला. परंतु, संजय लीला भन्साळीने सोनमला 'सांवरिया'मध्ये मुख्य नायिकेची भूमिका दिली. कपूर घराण्यात जन्माला येऊन देखील सोनमने कधी काळी वेटरची नोकरीही केली आहे. सिंगापूरमध्ये शिक्षणासाठी गेलेल्या सोनमला एक आठवड्यासाठी का होईना पण वेटरची नोकरी करावी लागली होती. तेव्हा सोनम १५ वर्षांची होती. बॉलिवूड करिअर फ्लॉप ठरल्यानंतर सोनमने २०१८ मध्ये आनंद अहुजासोबत लग्नगाठ बांधली. आता ते आई-बाबा होणार आहेत. बॉलिवूड अभिनेत्री सोनम कपूरला वाढदिवसाच्या शुभेच्छा. (सर्व फोटो : सोनम कपूर/ इन्स्टाग्राम)