Photos : ‘आली मंगल घटिका…’; यश-नेहाच्या लग्नसोहळ्यातील खास क्षणांचे फोटो पाहा

झी मराठीवरील 'माझी तुझी रेशीमगाठ' या लोकप्रिय मालिकेने सुरुवातीपासूनच प्रेक्षकांच्या मनात घर केलं आहे. मालिकेतील यश आणि नेहाची जोडी प्रेक्षकांच्या पसंतीस उतरली. तसंच परीच्या निरागस अभिनयाने प्रेक्षकांची मनं जिंकली. मालिकेच्या सुरुवातीपासून प्रेक्षकांना ज्या क्षणाची आतुरता होती तो क्षण आता जवळ आला आहे. यश आणि नेहा लग्नबंधनात अडकून त्यांच्या नवीन आयुष्याला सुरुवात करणार आहेत. मालिकेत यश आणि नेहा यांच्या लग्नसोहळ्यातील कार्यक्रमांची धामधूम पाहायला मिळत आहे. यश-नेहाचा विवाहसोहळा अगदी दिमाखदार पद्धतीने पार पडणार आहे. यश-नेहाचा साखरपुडा, यशची बॅचलर पार्टी, नेहाची मेहंदी, हळद यामध्ये घडलेली धमाल मजा मस्ती तर प्रेक्षकांना पाहायला मिळाली. पण आता यश आणि नेहाचा शानदार लग्नसोहळा प्रेक्षकांना पाहता येणार आहे. लग्नसोहळ्यासाठी नेहा आणि यश यांनी खास पोशाख केला आहे. गुलाबी रंगाच्या नऊवारी साडीमध्ये नेहाचं सौंदर्य अगदी खुलून दिसत आहे. तर यश नवरदेवाच्या पोशाखात राजबिंडासारखा तयार झाला आहे. पण या सोहळ्यात सगळ्यांचं लक्ष वेधून घेतलं ते चिमुकल्या परीने. शरारामध्ये परी खूपच गोड दिसते आहे. यश-नेहाचा दिमाखदार विवाहसोहळा प्रेक्षकांना रविवारी १२ जूनला लग्नविशेष भागात पाहायला मिळणार आहे.