Photos : ‘फिल्टरपाड्याचा बच्चन’ गौरव मोरे दाक्षिणात्य अभिनेत्रीसह करणार काम; ‘या’ चित्रपटातून येणार प्रेक्षकांच्या भेटीला

‘फिल्टरपाड्याचा बच्चन’ अशी ओळख असलेला अभिनेता गौरव मोरे ‘महाराष्ट्राची हास्यजत्रा’ शोमधून घराघरात पोहोचला. विनोदीबुद्धी आणि अभिनय कौशल्याने त्याने अल्पावधीतच कलाविश्वात आपलं वेगळं स्थान निर्माण केलं. विनोदवीर गौरव ‘महाराष्ट्राची हास्यजत्रा’ शोमधून प्रेक्षकांचे भरभरून मनोरंजन करतो. अनेकदा त्याच्या कामाची पावती म्हणून परिक्षकांकडून त्याला कौतुकाची थापही मिळते. गौरवचा चाहता वर्ग मोठा असून त्याने अभिनयाची छाप प्रेक्षकांच्या मनावर पाडली आहे. गौरव लवकरच मोठ्या पडद्यावर झळकणार आहे. एका मराठी चित्रपटातून तो प्रेक्षकांच्या भेटीला येणार आहे. ‘हवाहवाई’ असं या चित्रपटाचं नाव असून महेश टिळेकर यांनी चित्रपटाचे लेखन आणि दिग्दर्शन केले आहे. या चित्रपटात गौरव दाक्षिणात्य अभिनेत्रीबरोबर स्क्रिन शेअर करताना दिसणार आहे. ‘हवाहवाई’ चित्रपटाचा ट्रेलर नुकताच प्रदर्शित झाला असून ७ ऑक्टोबरला हा चित्रपट प्रेक्षकांच्या भेटीला येणार आहे. ‘द ग्रेट इंडियन किचन’ फेम दाक्षिणात्य अभिनेत्री निमिषा सजयन ‘हवाहवाई’ चित्रपटातून मराठी सिनेसृष्टीत पदार्पण करत आहे. या चित्रपटात ती मुख्य नायिकेची भूमिका साकारताना दिसणार आहे. ‘हवाहवाई’ चित्रपटाची कथा मध्यमवर्गीय गृहिणीच्या स्वप्नपूर्तीकडे होणाऱ्या संघर्षमय प्रवासावर आधारित आहे. चित्रपटात गौरव मोरेसह अभिनेता समीर चौघुले, सिद्धार्थ जाधव, अभिनेत्री वर्षा उसगावकर हे कलाकारदेखील महत्त्वाच्या भूमिकेत आहेत. गौरव मोरेला मोठ्या पडद्यावर पाहण्यासाठी त्याचे चाहते उत्सुक आहेत. (सर्व फोटो : गौरव मोरे/ इन्स्टाग्राम, आयएमडीबी) (हेही पाहा >> Photos : प्रसाद ओकच्या नवीन चित्रपटात ‘महाराष्ट्राची हास्यजत्रा’मधील ‘हा’ अभिनेता झळकणार)