Photos : राजू श्रीवास्तव यांनी ‘बच्चनगिरी’ करून केली होती पहिली कमाई; पण आयोजकाला पैसे परत करण्यासाठी गेले अन्…

आपल्या विनोदांनी लोकांना खळखळून हसवणाऱ्या राजू श्रीवास्तव यांची बुधवारी प्राणज्योत मालवली. राजू यांच्या आयुष्यामध्ये अमिताभ बच्चन याचे खूप महत्त्व होते. अमिताभ यांची मिमिक्री केल्यानंतरच्या एका घटनेमुळे त्यांचे आयुष्य बदलले. राजू श्रीवास्तव मुळचे कानपूरचे होते. मुंबईला येण्यापूर्वी कानपूरमध्ये असताना ते अनेक कार्यक्रमांमध्ये मिमिक्री करायचे. कानपूर शहरामध्ये आयोजित केलेल्या कार्यक्रमांमध्ये राजू अमिताभ बच्चन यांची मिमिक्री करायचे. या कार्यक्रमांसाठी पैसे घेऊयात असा विचार त्यांच्या मनात कधीही आला नाही. अशाच एका कार्यक्रमामध्ये मिमिक्री करायला ते गेले होते. सादरीकरण झाल्यानंतर आयोजकांनी त्यांना ५० रुपये देऊ केले. येण्या-जाण्याच्या खर्चासाठी असल्याचे आयोजकांनी पैसे दिले आहेत असे त्यांना वाटले. तेव्हा ते स्वखर्चाने त्या आयोजकाच्या घरी पोहोचले आणि दिलेले पैसे परत घेण्यासाठी आग्रह केला. मी तुम्ही दिलेले ५० रुपये परत करायला आलो आहे असे त्यांनी त्या आयोजकाला सांगितले. तेव्हा मी तुला तुझ्या सादरीकरणासाठी पैसे दिले होते, असे त्याने स्पष्ट केले. त्यादिवशी लोकांना हसवूनसुद्धा पैसे कमावता येतात ही गोष्ट राजू यांना कळली. या एका घटनेमुळे त्यांच्या आयुष्याला कलाटणी मिळाली. काही दिवसांनी राजू श्रीवास्तव यांनी कानपूर सोडून मुंबई गाठली. मुंबईमध्ये आल्यानंतर त्यांनी खूप नाव कमावले. राजू श्रीवास्तव यांनी राजकारणामध्येही प्रवेश केला होता. ते भारतीय जनता पार्टीचे सदस्य होते. त्याआधी ते समाजवादी पार्टीमध्ये होते. "द ग्रेट इंडियन लाफ्टर चॅलेज" या कार्यक्रमामुळे त्यांना खूप लोकप्रियता मिळाली होती. त्यांच्या जाण्याने मनोरंजन विश्वामध्ये न भरुन निघणारी पोकळी निर्माण झाली आहे. पंतप्रधान मोदींसह मनोरंजन विश्वातल्या अनेक कलाकारांनी राजू श्रीवास्तव यांना श्रद्धांजली वाहिली आहे. फोटो सौजन्य - राजू श्रीवास्तव फेसबुक