अनुष्का शर्माने न आवडलेले फोटो केले शेअर, एक्स बॉयफ्रेंड कमेंट करत म्हणाला…

बॉलिवूड अभिनेत्री अनुष्का शर्मा ही लोकप्रिय अभिनेत्रींपैकी एक म्हणून ओळखली जाते. तिने अभिनयाच्या जोरावर अल्पावधीतच चित्रपटसृष्टीत स्वतःचं वेगळं स्थान निर्माण केले. पण सध्या मात्र ती सिनेसृष्टीपासून दूर आहे. गरोदरपण आणि मुलीच्या संगोपनासाठी सिनेसृष्टीतून ब्रेक घेतलेली अनुष्का सोशल मीडियावर कायमच सक्रिय असल्याचे पाहायला मिळते. ती सोशल मीडियावर विविध फोटो आणि व्हिडीओ शेअर करत चाहत्यांच्या संपर्कात राहते. नुकतंच अनुष्काने तिचे नो मेकअप लूकमधील काही फोटो शेअर केले आहेत. तिने शेअर केलेल्या या फोटोंवर तिच्या एक्स बॉयफ्रेंडने कमेंट केली आहे. अनुष्काने शेअर केलेल्या या फोटोत ती तिच्या व्हॅनिटी व्हॅनसमोर उभी असल्याचे पाहायला मिळत आहे. यावेळी तिने हुडी आणि ट्राऊजर परिधान केली आहे. त्यासोबत तिने काळ्या रंगाचे शूजही घातले आहेत. यात तिने विविध पोज देत फोटो काढले आहेत. यावेळी तिच्या अदा कॅमेऱ्यात कैद झाल्या आहेत. अनुष्काने तिच्या या फोटोला फार मजेशीर कॅप्शन दिले आहे. "मला यातील एकही फोटो आवडलेला नाही. पण नंतर मी विचार केला की नेहमी चांगले फोटो पोस्ट करायचे हे कोणी सांगितलं आहे." "त्यामुळेच मी माझे जरा ओके ओके टाइप दिसणारे फोटो पोस्ट केलेत." "हे फोटो कदाचित मी शेअर केले नसते, पण ते काढण्यासाठी मी माझे अनमोल वेळ खर्च केला आहे." "त्यामुळे ते पोस्ट करणं गरजेचे आहे, चला ओके बाय", असे अनुष्का शर्माने म्हटले आहे. अनुष्का शर्माच्या या पोस्टवर अनेक कलाकारांनी प्रतिक्रिया दिली आहे. अभिनेता रणवीर सिंहने देखील तिच्या या फोटोवर कमेंट केली आहे. रणवीरने कमेंट करताना हसतानाचा इमोजी शेअर केला आहे. तर अर्जुन कपूरच्या कमेंटने सर्वांचेच लक्ष वेधून घेतले आहे. हुडी चांगला आहे. पण फोटो खराब आहे, याबद्दल मी सहमत आहे, असे अर्जुन कपूर म्हणाला. हेही पाहा : ‘हा माझा बायको पार्वती’ डायलॉग नेमका कसा सुचला? अशोक सराफ यांनी सांगितला किस्सा